Publiká riba 25 Mart 2020
Willemstad, 25 di mart 2020 – Gobièrnu di Kòrsou a tuma e desishon ku entrante awe, djárason 25 di mart 2020, tur tienda mester sera 8’or di anochi, ku eksepshon di restorant i trùk’i pan.
Tur restorant i trùk’i pan por mantené nan orarionan aktual. Motibu prinsipal pa apliká e “winkelsluitingstijd” aki ta komportashon no korekto ku frekuentemente ta krea aglomerashon sosial. E desishon áki ta pa intensivá distansha sosial i medidanan di prevenshon, ku e meta pa kombatí posibel plamamentu di COVID-19 riba nos isla.
Tur establesimentu mester keda tene kuenta ku distansha sosial i tambe e reglanan di atendé ku kuminda i bebida manera akordá den e ‘Regla temporal pa atende ku kuminda i bebida COVID-19’ ku tambe ta bálido entrante awe 25 di mart 2020 pa 1’or di mèrdia.
A opta pa sera tur tienda – ku eksepshon di truk’i pan i restorantnan – entrante awe djárason, 25 di mart 2020, pa 8’or di anochi pa asina protehá komunidat mas tantu ku ta posibel di Corona Vírùs. No ta fasil tuma un desishon asina aki, ni motibu di pániko. Esaki ta simplemente un medida di prekoushon.
