Bo opinion

Notisia

Entrante djamars 26 febrüari 2019 ta kuminsá kùr e vehíkulonan ku siman pasa a pèrdè nan sita

Geplaatst op 22 February 2019 dor di Ministerio Tráfiko, Transporte i Planifikashon Urbano

Willemstad – Servisio pa Tráfiko i Transporte (UO-VV) “Keuringslokaal” ta anunsiá ku entrante djamars awor 26 febrüari ta kuminsá kùr ,den fase, e vehíkulonan ku a pèrdè sita siman pasa.

Debí na e akshonnan di empleadonan públiko di siman pasa, esnan ku tabatin sita dianan 19, 20, 21, i 22 di febrüari último no por a kùr nan vehíkulo. E situashon a kousa bastante iritashon bou di e klientenan i p’esei UOVV a tuma sierto medidanan pa akomodá tur ku a sali perhudiká.

UOVV ta informá tur kliente ku tin sita planeá pa fecha nan 25, 26,27, 28 febrüari i 1 di mart ku esaki ta keda mesun kos.

Pa e personanan ku tabatin sita dia 19 febrüari por akudí na Keuringslokaal djamars 26 febrüari. Esnan ku tabatin sita 20 di febrüari por bai kùr nan vehíkulo djárason 27 febrüari . Djaweps 28 febrüari ta toka turno na esnan ku tabatin sita 21 febrüari i esnan ku tabatin sita 22 febrüari mester bai ku nan vehíkulo na Keuringslokaal dia 1 di mart entre 7:30 pa 11:30 i 13:30 pa 15:00.

Un súplika ta bai na tur kliente ku a pèrdè nan sita durante e siman di 19 pa 22 di febrüari, pa akudí na Keuringslokaal ku nan komprobante di sita. Tene na kuenta ku sin e komprobante aki lo no por kùr bo vehíkulo. Tambe nos ke informá ku e preis di kùr ta keda F.30,- pa e grupo di siudadanonan ku a pèrdè nan sita pa motibu di e wèlga.

UOVV ta pidi su diskulpa pa kualke inkumbiniensia i ta gradisí alabes pa e koperashon.

Pa mas informashon por tuma kontakto ku direktor suplente di UO-VV (Keuringslokaal) sr. Angela na telefòn 517-7100.

Ministerio konserní