Publiká riba 25 Sèptèmber 2019
WILLEMSTAD- Den kuadro di e trayekto pa mehora presupuesto gubernamental, konseho di minister a bai di akuerdo den un desishon fechá 03 di aprel di e aña aki pa konhuntamente traha riba diferente aspekto konforme e rapòrt “Monitoring actiematrix”. Pa loke ta trata Ministerio di Desaroyo Ekonómiko(MEO) e petishon a keda hasí pa bini ku un proposishon konkreto pa loke ta trata kobransa di leges mará na pèrmitnan di establesimentu.
Den e dekreto gubernamental ku ta trata leges (Legesverordening 1992 no.20) ta indiká ku tur empresa tin e deber di paga leges na Gobièrnu di Kòrsou pa pèrmitnan di akuerdo ku e areglo di establesimentu di empresanan na Kòrsou. Konforme e areglo aki, e kantidat di leges pa e pèrmit di establesimentu tabata mará na e grandura di e kapital sosial di e empresa enkuestion.
Sinembargo te ku awor e montante di leges ku kada kompania mester paga no a keda kobrá manera tabata stipulá den lei, lokual tambe a yuda kontribuí na e défisit ku kaha di gobièrnu ta eksperensiá.
A base di esaki un proposishon di parti di Ministerio di Desaroyo Ekonómiko a keda entregá na konseho di minister resientemente pa entrante 1 di sèptèmber último inisiá ku kobransa di leges riba pèrmitnan di establesimentu i pèrmit di direktor ku forsa retro-aktivo te ku 1 yanüari 2019. Esaki ta nifiká simplemente ku e leges ku kada kompania eksistente lo mester a paga na inisio di e aña aki riba nan pèrmit di establesimentu (vestigingsvergunning), lo keda kobrá entrante 1 di sèptèmber 2019. Den un desishon fechá 28 di ougùstùs 2019 konseho di minister a bai di akuerdo ku e proposishon aki. Pues kuminsando 2019 kada doño di empresa lo mester sigui paga leges anualmente riba e pèrmit di establesimentu di su empresa i tambe pèrmit di direktor.
Pago di leges lo tuma lugá via Ontvanger i kada empresario eksistente lo risibí un faktura den pòst huntu ku instrukshonnan kon i kuantu pa paga na leges. Pa mas informashon tokante pèrmitnan ekonómiko en general i/òf e montantenan di leges i e prosedura di pago, por manda un mail na info.meo@gobiernu.cw
