Publiká riba 01 Ougùstùs 2018
Durante un seremonia kòrtiku ku a tuma lugá resientemente na Kas di Kòrsou na Den Haag, e studiante Nishendra Conep ku a finalisá Maris Stella SBO ku éksito, a risibí su diploma (niveau 3) den presensia di Minister di Enseñansa, Siensia, Kultura i Deporte, sra. Marilyn Alcalá-Wallé, Minister Plenipotensiario sr. Anthony Begina i sectordirecteur di Uitvoeringsorganisatie Onderwijs en Wetenschap, sr. Wladimir Kleinmoedig.
Motibu di e seremonia ofisial aki ta pa e echo ku e studiante aki mester a biaha pa Hulanda pa motibunan personal, promé ku fecha ofisial di entrega di diploma na Kòrsou. Pa fasilitá e studiante i pa garantisá ku kada studiante ku a finalisá nan estudio segun e kondishonnan di estudio, por risibí un diploma, a organisá e seremonia aki kaminda e dos ministernan ya menshoná a fungi komo testigu. Den kasonan nesesario, Kabinete Rhuggenaath ta brinda e servisio aki pa asina tur studiante por risibí nan diploma garantisá pa asina por kontinuá ku nan karera pa sigui forma i desaroyá nan mes sin interupshon innesesario.
Riba potrèt por mira e akto ofisial kaminda e studiante ta firma su diploma den presensia di Minister di Enseñansa, Siensia, Kultura i Deporte, sra. Marilyn Alcalá-Wallé, Minister Plenipotensiario sr. Anthony Begina i sectordirecteur di Uitvoeringsorganisatie Onderwijs en Wetenschap, sr. Wladimir Kleinmoedig.
Fotógrafo: Caïnva Isenia
