Publiká riba 04 Ougùstùs 2023
Willemstad – Otro siman, 10 di ougùstùs 2023, ta apertura ofisial di aña eskolar 2023 – 2024. Esaki ta nifiká ku hóbennan ku ta bai skol mester di transporte pa yega einan pa nan haña nan enseñansa.
Resientemente bastante mayor a hasi un petishon na Vergunningenloket (Lokèt di Pèrmit) pa bini na remarke pa risibí transporte eskolar pa nan yunan. E petishonnan ta den tratamentu ainda i pronto lo ta konosí pa kada petishonario.
Un apelashon ta bai na mayornan pa keda pendiente den e próksimo dianan pa por risibí un yamada telefóniko i/òf un e-mail pa por pasa buska e karta pa transporte eskolar pa e yunan.
Pa tuma e karta por pasa na Vergunningenloket na Saliña 127 di djaluna pa djaweps di 8’or di mainta te 3’or di mèrdia. Riba djabièrnè ta sera 12’or di mèrdia. Tambe por haña informashon di Transporte pa skol na: https://loketdigital.gobiernu.cw/onderwijs/schooltransport
Nos diskulpa pa kualke inkumbiniensia ku esaki por kousa.
