Publiká riba 30 Yüni 2020
WILLEMSTAD – Gobièrnu di Kòrsou den persona di Minister Eugene Rhuggenaath i Minister Steven Martina a hasi entrega di e kondekorashon di Krus di Mérito e aña aki na 4 nominado. E entrega a tuma lugá konforme e reglanan di distansha sosial den e sala multifunshonal di Fòrti. E kuater personanan ku a keda kondekorá ta sr. Benedicto Marte, mihó konosí komo Benno, sr. Julio Constantino Hermanus, mihó konosí komo Eligio Melfor, sr. Gladwin L. de Lanoi i sr. Lionel Jules Janga.
Krus di Mérito Kòrsou ta e manera ku Kòrsou ta rekonosé dignamente su baluartenan durante di nan bida. E ta un kondekorashon instituí pa Gobièrnu di Kòrsou, pa duna rekonosimentu na personanan ku a desplegá aktividatnan meritorio, den un forma partikular, pa komunidat di Kòrsou. kada un di e nominadonan a duna nan aporte den vários ramo ku meresé apresio pa e balor agregá na nos nashon.
Sr. Benedicto Marte, nasé 21 di mart 1933 na Kòrsou i mihó konosí komo Benno, a sa di duna un empuhe musikal na nos Tambú. Julio Constantino Hermanus, mihó konosí komo Eligio Melfor i a nase dia 12 di aprel 1940 na Kòrsou, a sa di entretené nos komunidat ku e arte di dramatisashon. Sr. Gladwin L. de Lanoi ku a nase dia 4 di novèmber 1944 na Kòrsou, a aportá hopi na nos pueblo riba tereno di natashon. Sr. Lionel Jules Janga, nasé dia 12 di aprel 1956 na Kòrsou, a duna un aporte di gran balor na nos nashon den e ramo di siensia komo boluntario den vários organisashon.
Pa mas informashon por ‘download’ e biografia di e Kondekoradonan aki: Biografia di e 4 Kondekoradonan Krus di Mérito 2020.
Ku entrega di e kondekorashon aki Gobièrnu di Kòrsou ta duna rekonosementu na nos mes hendenan pa nan aporte balioso na nos pais. Duna rekonosementu na nos mes hendenan ta un aporte importante na patriotismo; E yabi pa logra e Kòrsou ku nos tur ke!
—
**riba e fotonan athunto por tuma nota di e momentu ku e kondekoradonan ta risibí nan kondekorashon for di Minister E. Rhuggenaath i Minister S. Martina.
