Publiká riba 30 Òktober 2017
Willemstad – Den kuadro di konmemorashon 50 aña kaida di Brùg Juliana, 6 di novèmber próksimo, Gobièrnu di Kòrsou representá pa Minister Presidènt sr. Rhuggenaath i Minister di Tráfiko, Transporte i Planifikashon Urbano sra. Zita Jesus-Leito a hasi entrega di “lesbrieven” na Oranjeschool na Oranjestraat i Kolegio Santa Famia na Otrobanda. E ‘lesbrief’ aki ta konta e historia rondó di e kaida di Brùg Juliana.
Esaki tabata un di e tragedianan di mas grandi ku Kòrsou i, e tempu ei Antia, a konosé. No ménos ku 16 yu, ruman i/òf tata di famia a pèrdè nan bida di un forma trágiko. Esaki a laga un impakto grandi riba bida di esnan mas yegá di e víktimanan i komunidat kompletu.
Banda di esaki Brùg Juliana a trese hopi kambio. E kambionan aki ta entre otro demográfiko, mester a kibra barionan pa por traha vianan pa yega na e brùg. El a trese tambe kambio di infrastruktura i tráfiko, i outomobilistanan no tabatin nodi di pasa rònt Schottegat mas si nan kier bai di Punda pa Otrobanda, pero por a hasi uzo di Brùg Juliana.
Den transkurso di siman Fundashon Material Skol (FMS) ta sòru pa tur skol básiko na Kòrsou risibí e ‘lesbrief’ aki kaminda dosentenan tin material pa kompartí e parti aki tambe di Kòrsou su historia ku nos muchanan.
Durante di henter e siman aki lo tin diferente aktividat relashoná ku e tópiko aki. Djabièrnè dia 3 di novèmber lo tin un simposio na Universidat di Kòrsou pa 6or di atardi ku ta habri pa públiko. Djadumingu dia 5 di novèmber lo tin un santu sakrifisio di misa na Misa di Santa Famia Otrobanda pa 9or di mainta. I djaluna lo tin e konmemorashon ofisial parti mainta na e monumento na pia di brùg.
Ku tur esaki, Gobièrnu di Kòrsou ta duna atenshon meresí na e suseso importante aki komo parti di e historia di nos pais.
