Publiká riba 23 Òktober 2017
Ministerio di Enseñansa, Siensia, Kultura i Deporte huntu ku Fundashon Material pa Skol (FMS), Biblioteka Nashonal Kòrsou (BNK) i Fundashon Almirante P. Luis Brion a tene un aktividat spesial pa re-alse di balor históriko kultural di nos Nashon. E aktividat aki ta hopi importante pa nos skolnan pesei huntu ku ku un skol ku ta karga e nòmber di e héroe aki a tene un bunita mainta.
Representantenan di FMS den persona di sra. Aishel Statie i Erwin Alexander, ‘riba inisiativa di Minister di Enseñansa, Siensia, Kultura i Deporte (MESKD) a traha huntu ku señor Maxie de Groot kende ta representante di Fundashon Almirante P.L. Brion ‘riba produkshon di un ‘lesbrief’ di e historia Almirante P. Luis Brion. E ‘lesbrief’ aki na 2 diferente nivel indiká komo TOMO 1 i TOMO 2 ta pa enseñansa di Fundeshi. E ta produsí tantu na Papiamentu komo na Hulandes i ta konta e historia di un héroe Yu di Kòrsou P.L.Brion. Den e TOMO nan ta elaborá riba e nasementu i bida di e gran baluarte aki.
E mainta a kuminsá na Skol P. Luis Brion kaminda tur mucha di e skol a kanta himno den presensia di nos Minister di ESKD sra. Marilyn M. Alcalá-Wallé i representante nan di Ministerio di ESKD, BNK, FMS i mas organisashon. Despues kabes di skol, maestro i alumnonan di grupo 6 di e skol huntu ku Ministerio di ESKD, BNK i FMS a drenta bùs i baha dilanti Fort Amsterdam. Einan e guianan. Señor Arthur Tholel (relashonista públiko di BNK) i sr. Harry Moon (músiko i historiadó renombrá) a konta un tiki di e historia di Fort Amsterdam.
Despues a krusa brùg Emma i topa ku Minister sra. Alcalá – Wallé i representantenan di Direktivanan di Skolnan kaminda a hasi entrega ofisial di e TOMO nan. Despues di e akto ofishal aki a sigui ku un paseo/kaminata den kayanan di Otrabanda guiá pa sr. Arthur Tholel i sr. Harry Moon. A paseá entre otro den hanchi di bientu (conscientiesteeg) i bishitá Basílika di Sta. Anna kaminda a batisá P.L. Brion dia 6 yüli di aña 1785. Tambe a kana bai mas kaminda históriko manera ser’i Trapi, charlottesteeg, frederickstraat i yega te na ser’i plasa na canniestraat.
Despues a bai Brionplein bèk na e Kiosko kaminda a kome i bebe algu pa bolbe subi bùs bai direkshon di Biblioteka Nashonal Kòrsou. Na biblioteka tur mucha i hende grandi a bishitá un eksposishon di Almirante P. Luis Brion; un aktividat ameno den presensia di direktora di BNK sra. Gerda Willems. Di e manera aki a klousura e mainta.
Konstrukshon di nos Nashon ta kuminsá ku konosementu di nos historia i rekonosementu na nos mes hendenan. Pesei Ministerio di E.S.K.D. ta mira bèk riba un aktividat fruktifero i ke yama danki na tur ku a duna di nan parti pa hasi e aktividat aki posibel.
