Publiká riba 25 Yanüari 2019
Willemstad – Minister Zita Jesus Leito huntu ku Servisio pa Planifikashon Urbano (ROP) a hasi entrega di e pèrmit di konstrukshon pa fase 1 di e proyekto turístiko di Corendon Curaçao na e lokalidat di antes Holiday Beach i Venetto. Esaki sigur ta un proyekto ku ta bai enrikesé nos pais Kòrsou ku un hotèl ku ta disfrutá di un renombre internashonal.
Corendon Curaçao ta bai duna e área di Otrabanda un realse, esaki debí ku e hotèl su konstrukshon ta kontené remodelashon di dos kompleho di kamber eksistente i konstrukshon nobo di un área ku lo konektá e dos komplehonan aki na otro. Tambe konstrukshon nobo di e lobi ku mas kamber èkstra ku tur e fasilidatnan nesesario pa e futuro turistanan ku lo bishita Kòrsou.
E hotèl lo risibí un kara nobo i full moderno ku lo hasi e área aun mas atraktivo. Pa logra e meta aki nan a risibí nan pèrmit di konstrukshon pa konstruí un hotèl ku un kapasidat di aproksimadamente 300 kamber, ku lo disfrutá di un lobi pa entretené i suministrá e bishitantenan di e hotèl. E konstrukshon kompleto no tin un durashon fiho, pero pa final di aña 2019 ta premirá ku e promé fase di e proyekto ta kla. Aparte di e prome fase aki e intenshon ta pa Corendon yega na e hotel mas grandi den Reino ku fase 2 i un total di 800 kamber.
Den kuadro di optimalisashon di e servisio di ROP, ta importante pa remarká ku e proyekto di Corendon Curaçao a wòrdu entregá den e último kuartal di aña 2018. Na inisio di 2019 ROP huntu ku Minister Zita Jesus Leito a traha duru pa por otorgá e pèrmit di konstrukshon den un término kòrtiku, mirando e embergadura di e proyekto.
Durante di e tratamentu di e pèrmit di konstrukshon, diferente entidat di Gobièrnu, manera entre otro Brandweer, a konsehá riba diferente aspekto nesesario pa otorgamentu di e pèrmit di konstrukshon pa Corendon Curaçao. E proyekto aki tin un impakto ekonómiko grandi pa pais i spesialmente di un balor arkitektóniko den e área di Otrabanda. Huntu ku e proyekto aki tambe lo kuminsa riba termino kortiku ku e area di mangrove i saneamentu di esaki.
Minister Zita Jesus Leito ta hopi kontentu ku tipo di proyektonan grandi ta wòrdu atendé ku hopi diligensia i seriedat i tambe ku e ta ofresé pais Kòrsou un hotèl di kalidat i moderno pa nos sektor di turismo.
Pa mas informashon por tuma kontakto ku ROP via e number +5999433-3200. Tambe por manda Whats app na number di telefòn +5999511-8582 òf por manda e-mail na info.rop@gobiernu.cw.
