Entrega di Revista Sklabitut i Awe - Informashon tokante Gobièrnu di Kòrsou Bo opinion

Notisia

Entrega di Revista Sklabitut i Awe

Geplaatst op 07 July 2021 dor di Ministerio Enseñansa, Siensia, Kultura & Deporte

WILLEMSTAD – Riba dia di Abolishon di Sklabitut, Minister di Enseñansa, Siensia, Kultura i Deporte sr. Sithree van Heydoorn a hasi entrega di e promé ehemplarnan di e revista Sklabitut i Awe (Slavernij en Nu) na dos skol ku ta Kolegio Elis Juliana i Sint Paulus College. E revista akí ta un inisiativa di Museo di Reino (Rijksmuseum) huntu ku Plataforma Sklabitut i Herensia di Sklabitut (PSHS), i ku tin komo meta pa stimulá nos hóbennan pa ku nos historia.

E revista akí ta keda partí na tur pais di Reino i a kuminsá ku e entrega aki na Kòrsou. Departamentu di Edukashon di Museo di Reino ku a keda representá pa sr. Thijs Gerbrandy huntu ku sra. Jeanne Henriquez di PSHS, a traha riba e trayekto akí pa hasi entrega di e revista edukashonal na tur skol di Kòrsou. Dosentenan di grupo 7 i 8 por hasi uso di e revista pa instruí i eduká nos alumnonan riba e tema di sklabitut i awe. E revista ta mará tambe na e eksposishon ku tin aktualmente den Rijksmuseum na Hulanda tokante di sklabitut.

Den e revista akí tin dos artíkulo ku ta bai tokante di Kòrsou, pero tambe otro paisnan ku tabata forma parti di kolonia di Hulanda den siglo 17 i 18 manera entre otro Sürnam i Indonesia. Nos muchanan por siña for di otro muchanan kon nan pais ta konektá na sklabitut i tambe kiko ta nan deseo pa nan pais i nan mes bai dilanti. Maestronan tambe por konektá riba e sitio wèp di Rijksmuseum pa haña ehèmpelnan di lèsnan ku nan tin pa maestronan. Es desir un otro perspektiva riba sklabitut for di diferente brel di awe. Pa mas informashon di e revista por ‘download’ e revista aki: Revista Slavernij en Nu.

Gobièrnu ta spera ku e kolaborashon entre e organisashonnan ta trese un dimenshon nobo pa nos siña tokante sklabitut na un otro forma. Minister Sithree van Heydoorn ta spera ku e revista akí lanta interes riba e tópiko i habri oportunidat pa nos por sigui papia tokante di sklabitut i saka forsa for di dje.

 

**Riba e pòrtrètnan athunto por tuma nota di momento di entrega di e Revista Sklabitut i Awe na e skolnan.

Ministerio konserní