Bo opinion

Notisia

Entrega di yabi di proyekto ‘Micro PPP Fortuna Ariba!’

Geplaatst op 15 February 2019 dor di Ministerio Tráfiko, Transporte i Planifikashon Urbano

Willemstad – Djamars 14 di febrüari Minister Zita Jesus-Leito a hasi entrega ofisial di yabi pa kasnan di e proyekto Micro PPP Fortuna Ariba. Ta trata di 14 kas pagabel ku ta forma parti di e proyekto Public Private Partnership (PPP), kual ta nifiká ku gobièrnu ta traha huntu ku partnernan privá pa traha bibienda pa nos siudadanonan. Den presensia di empleadonan di Domeinbeheer, S&H Construction Real Estate i habitantenan di e área di Fortuna Ariba, Minister Zita Jesus-Leito a hasi entrega di forma ofisial di e proyekto Micro PPP Fortuna Ariba.

Un di e nesesidatnan básiko den bida di un hende ta bibienda. Pa e motibu aki, Minister Jesus-Leito tin esaki komo un di su prioridatnan i ta hasi tur loke ta posibel pa realisá proyektonan kual ta yuda kada persona yega na un bibienda pagabel. 

S&H Construction Real Estate ta e kompania ku tabata enkargá ku konstrukshon di e kasnan. Pa ku e proyekto aki Domeinbeheer a enfoke riba personanan ku ta riba  lista di espera di Domeinbeheer ku tin entrada brutu di entre 3.500 pa 5.500 florin pa luna.  Esaki ta hasi posibel ku esnan ku tin un entrada medio tambe por a bin na remarke pa nan mes kas.

Domeinbeheer ta sigui traha duru riba proyektonan similar di PPP pa fasilitá personanan ku ta den nesesidat di bibienda pagabel i di bon kalidat.

Ministerio konserní