Notisia

Jeritza Vivas ta risibí Premio Cola Debrot 2026 (disiplina Baile)

WILLEMSTAD – Konseho Kultural Kòrsou a proponé sra. Jeritza Vivas komo ganadó di Premio Cola Debrot 2026 riba e disiplina Baile, spesífikamente den e género di baile folklóriko. Riba 22 di aprel 2026, Konseho di Minister a ratifiká e proposishon di Konseho Kultural Kòrsou. I riba 4 di mei 2026 e entrega di Premio Cola Debrot a tuma lugá, organisá pa Sektor di Kultura i Deporte na Palasio di Gobernador di Kòrsou.

E hurado ta enfatisá ku señora Vivas durante hopi aña a dediká su mes na un manera eksepshonal na desaroyo, konservashon i inovashon di e herensia di baile folklóriko di Kòrsou. For di 2011, e ta kontribuí di forma struktural i inkansabel na e sektor, entre otro pa medio di su partisipashon den SKOBA (Asosashon Skolnan di Baile Kòrsou).

Méritonan prinsipal:
Segun e rapòrt di hurado, señora Vivas ta distinguí su mes pa:

• Su dedikashon sostenibel pa konservashon i desaroyo di bailenan tradishonal, manera wals, tumba, tambú, mazurka i seú, kaminda e ta kombiná outentisidat ku inovashon.
• Su ròl komo edukadó, kaminda e ta forma bailadó di manera struktural i stimulá partisipashon di hóbennan den e sektor kultural.
• Su kontribushon komo koreógrafo, kaminda e ta garantisá tantu kalidat komo desaroyo artístiko di baile folklóriko.
• Su kapasidat fuerte pa organisá, inkluyendo organisashon di kompetensianan i eventonan públiko ku ta oumentá visibilidat di baile folklóriko.
• Su trabou komo empresario kultural, ku enfoke riba sostenibilidat finansiero i organisatorio, entre otro pa medio di aktividatnan pa rekoudá fondo (fundraising) i gala.
• Su ròl komo forsa ku ta konektá den komunidat, kaminda e ta trese huntu generashonnan i kontribuí na koheshon sosial i formashon di identidat.

Impakto amplio riba komunidat:
E kontribushon di señora Vivas ta bai mas ayá di prestashonnan artístiko. Su trabou a keda demostrá di tin un efekto duradero riba e arte di baile di Kòrsou. A la bes e ta kontribuí di forma esensial na fortalesé identidat kultural i herensia kultural di forma tangibel i intangibel di nos pais. E hurado a konstatá ku e ta kumpli ku tur kriterio pa risibí e premio i ta konsiderá sra. vivas komo un figura di importansia nashonal den e mundu folklóriko.

E entrega di premio a keda hasí pa minister di Desaroyo Sosial, Labor i Bienestar, sra. Charetti America-Fransisca, huntu ku minister di Hustisia, sr. Shalten Hato i Gobernador di Kòrsou, sr. Maurits de Kort.

Tuma nota di e reportahe fotografiko:

MAS NOTISIA

Ministerio konserní: Enseñansa, Siensia, Kultura & Deporte