Publiká riba 30 Òktober 2026
Willemstad – Ministerio di Salubridat, Medio Ambiente i Naturalesa (GMN) ta anunsiá ku e areglo temporal entrante sèptèmber 2024 pa deshasí grátis di shushi na Landfill i na transbordo di shushi di Selikor, ta terminá entrante promé di yanüari 2027. For di e fecha akí, e reglanan i kondishonnan ku tabata aplikabel promé ku sèptèmber 2024 lo ta aplikabel atrobe.
Pa mayoria di shushi komersial, lo keda posibel pa deshasí di dje grátis asta despues di promé di yanüari 2027, basta ku entreg’é separá i ku e ta trata di e kategoria di shushi ku ta kualifiká pa esaki. E opshonnan pa deshasí grátis di shushi separá lo ser ampliá mas aleu. Nada no ta kambia pa kasnan partikular.
For di areglo temporal pa un maneho di shushi sostenibel
Na sèptèmber 2024, a introdusí un medida temporal ku ta permití pa deshasí di shushi komersial grátis na Selikor. Ta notabel ku for di te tempu ei kompanianan tabata entregá nan shushinan separá ménos frekuente. Shushi separá por ser reusá i resiklá i nan ta okupá konsiderablemente ménos espasio na Landfill. Promové separashon di shushi pues ta di gran importansia pa un maneho di shushi sostenibel.
Gobièrnu a anunsiá e kambio di maneho akí kaba na kuminsamentu di 2026. E fecha definitivo ta fihá awor pa promé di yanüari 2027. No ta introdusí ningun tarifa òf kondishon nobo. Ta reinstalá e reglanan di promé ku sèptèmber 2024, suplementá pa opshonnan mas amplio pa ofresé shushi separá grátis. Esaki ta hasi separashon di shushi un eskoho finansieramente mas atraktivo pa negoshinan tambe.
Kiko esaki ta nifiká pa bo?
Hogarnan: pa kasnan partikular nada no ta kambia. Manera semper, nan por ofresé te ku 1.000 kilo di shushi pa aña kalendario grátis na Selikor.
Negoshinan: Pa un mayoria di shushi di negoshi, deshasí di nan grátis lo ta posibel basta ku entregá nan separá. Esaki ta konta pa un kantidat grandi di diferente kategoria di shushi inkluyendo shushinan di konstrukshon i shushi di kurá den komponentenan separá. Entregá separá no ta nifiká ku por djis deshasí di tur sorto di shushi grátis.
Pa medio di un kampaña di informashon lo splika na públiko tokante kua di e kategorianan di shushi ta kualifiká i bou di ki kondishon. Pa shushinan ku no ta entregá òf ku no separá korektamente e tarifa regular di promé ku sèptèmber 2024 ta konta.
Shushi industrial i spesial: pa shushi industrial i shushi spesial (manera shushi médiko, kímiko, ku ta kontené asbèst òf elektróniko i shushi di barku) e tarifa i kondishonnan di promé ku sèptèmber 2024 ta keda aplikabel.
Deshasí di shushi grátis ta konta solamente pa shushi produsí riba Kòrsou.
Yamanada na kompanianan
Ministerio di GMN ta hasi un yamada na kompanianan i partikularmente transportadónan, kontratistanan i kompanianan di konstrukshon, pa usa e periodo benidero pa aliniá nan operashonnan di akuerdo ku esaki i pa kuminsá rekohé i entregá shushi di forma separá na tempu. Di e manera akí, nan por sigui hasi mas tantu uso posibel di e opshonnan pa deshasí di shushi grátis despues di promé di yanüari 2027 i duna un kontribushon direkto na un Kòrsou mas limpi.
Informashon i sosten pa Selikor
Gobièrnu i Selikor konhuntamente ta lansa un kampaña di informashon splikando kon por entregá shushi separá korektamente. Selikor ta mehorá su fasilidatnan pa e rekohementu separá di shushi na Landfill i na transbordo di shushi, invertí den redukshon di volúmen di shushi i asistí esnan ku ta bin deshasí di nan shushi ku konseho si ta deseá.
Kontribushon na medio ambiente i naturalesa
Separashon di shushi ta un di e maneranan mas efikas pa protehá medio ambiente i naturalesa riba Kòrsou. Por reusá shushi separá komo materia prima òf redusí esaki signifikantemente den volúmen. Esaki ta prolongá e durashon di bida di Landfill i ta redusí preshon riba nos medio ambiente, naturalesa i salú públiko. Ku e kambio di maneho akí, nos ta invertí konhuntamente den un Kòrsou saludabel, tambe pa futuro generashonnan.
Mas informashon
Pa preguntanan tokante e maneho di shushi òf e rekohementu separá di shushi por tuma kontakto ku Selikor na number di telefòn 566 1635.
Huntu, nos ta traha riba un futuro duradero pa Kòrsou.