Bo opinion

Notisia

EU Desk Curaçao ta brinda gran posibilidatnan di desaroyo i kresementu via programa di Erasmus+

Geplaatst op 28 November 2019 dor di Ministerio Desaroyo Ekonómiko

WILLEMSTAD- EU Desk Curaçao huntu ku Nationaal Agentschap Erasmus+ Onderwijs & Training a organisá resientemente un seshon di informashon pa trahadónan den enseñansa na Kòrsou. Durante e seshon aki partisipantenan a risibí informashon riba posibilidatnan pa nos tambe por hasi uso di konosementu i eksperensianan pero tambe finansiamentu ku ta keda brindá via e programa di Erasmus+.

 EU Desk Curaçao su tarea prinsipal ta, pa fungi komo un punto di kontakto nashonal aki na Kòrsou pa tur loke ta trata areglo di supsidio Oropeo. EU Desk ta sòru entre otro pa identifiká propuestanan finansiero di Union Oropeo kual Kòrsou lo por bini na remarke p’e i ta stimulá e akseso na e finansiamentu nan aki. E tareanan di EU Desk Curaçao ta keda ehekutá pa trahadónan di e sektor di Kolaborashon Ekonómiko ku Eksterior denter di nos Ministerio di Desaroyo Ekonómiko (MEO).
Den Kuadro di e tareanan aki EU Desk a logra identifiká entre otro posibilidatnan masha balioso ku ta eksistí pa nos sektor di enseñansa. Den su kalidat komo nos Minister Plenipotensiario suplente na Den Haag i tambe embahador di EU Desk na Ulanda, Sra. Eunice Eisden a logra hasi posibel pa nos por a tene un seshon informativo aki na Kòrsou ku Agentschap Erasmus+ riba e posibilidatnan aki.


Durante e seshon di informashon aki, partisipantenan por a risibí informashon amplio riba e programa Erasmus+ di Komishon Oropeo.
Erasmus+ ta un programa ku lo proveé oportunidat na mas di 4 mion residente oropeo pa por studia i haña entrenamentu i eksperensia di trabou den eksterior. E oportunidat aki no solamente ta wòrdu brindá na studiantenan pero tambe individualnan di diferente edat i organisashonnan di interes.
Erasmus+ su meta ta, pa kontribuí di e forma aki na e strategia oropeo 2020 i asina aportá na kresementu, trabou, igualdat sosial i inklusividat.
Kualke persona interesá pa sa mas tokante e programa aki por bishitá www.erasmusplus.nl kaminda tin informashon amplio tokante e programa i e posibilidatnan ku esaki ta brinda.

E seshon di informashon ku a keda organisá aki na Kòrsou a konta ku partisipashon di 230 personal di nos sektor di enseñansa lokal i ku oradornan direktamente for di Erasmus+ manera, sra Annemarie de Ruiter; lider di e tim di Nationaal Agentschap Erasmus+ Onderwijs & Training i konsehero di e sektor di enseñansa avansá ,sr. Frank van Hoek kende ta konsehero den e sektor di edukashon na adulto (volwasseneducatie) i enseñansa sekundario pa formashon profeshonal (MBO) i tambe sra Judith Dayus- Brouwer den su tarea di konsehero den sektor di enseñansa primario i enseñansa avansá. Durante e okashon aki tambe a hiba palabra sra Eunice Eisden komo embahador di EU Desk na Ulanda i tambe sr Max Bueno de Mesquita di Ministerio di Enseñansa, Kultura i Deporte.
Di awor te ku 4 di febrüari 2020 lo tin e posibilidat pa entregá petishon pa finansiamentu di proyektonan spesífikamente di enseñansa. Pa mas informashon i/òf pa sa si bo proyekto ta bini na remarke pa finansiamentu tuma kontakto ku EU Desk Curaçao via mail na eudeskcuracao@gobiernu.cw òf telefónikamente na 462-14444 ekst. 181. Tambe interesadonan por haña informashon amplio di nos tareanan i propuestanan disponibel riba página di Facebook di EU Desk Curaçao.

Ministerio konserní