Publiká riba 21 Òktober 2021
Willemstad- Den e siman di 8 pa 12 di Novèmber benidero, EU Desk Curaçao ta tene un siman di informashon dediká na tantu programa komo fondonan Oropeo ku organisashonnan na Kòrsou por bini na remarke p’e. Tur aña Union Oropeo ta pone un presupuesto kuantioso disponibel pa yuda organisashonnan den Oropa i paisnan ku ta ligá ku Oropa. Organisashonnan na Kòrsou tambe ta bin na remarke pa e fondonan akí. E Siman di Fondonan Oropeo ta keda organisá ku e meta pa krea mas interes serka instansianan lokal, pa hasi uso di e fondonan disponibel i pa yuda nan apliká pa finansiamentu. E aña akí, e evento ta tuma lugá kompletamente virtual i tur hende por partisipá via Zoom.
Esaki ta di dos biaha ku EU Desk Curaçao ta organisá un Siman di Fondonan Oropeo. E promé evento a tuma lugá aña pasá na luna di òktober. EU Desk Curaçao ta un departamento ku ta kai bou di e Sektor di Koperashon Ekonómiko Internashonal di Ministerio di Desaroyo Ekonómiko i ta fungi komo sentro di kontakto na Kòrsou pa programa i fondonan Oropeo di supsidio.
Durante e siman di Fondonan Oropeo, EU Desk Curaçao ta tene diferente seshon di informashon masha interesante den estrecho koperashon ku representantenan di diferente organisashon Oropeo ku ta atendé direktamente ku e fondonan aki. Entre nan, por konta ku partisipashon di e Agensia Hulandes ku ta traha ku e programa Erasmusplus. Erasmusplus ta un fondo ya basta konosí na Kòrsou, sigur den sektor di enseñansa. Tambe lo tin representante di e asosiashon OCTA ku ta e organisashon kende ta representá e paisnan Ultramar (Overseas Countries & Territories). Kòrsou tambe ta forma parti di e OCTA komo un pais Ultramar. Resientemente Union Oropeo a adaptá e areglo di koperashon ku e tin ku e paisnan Ultramar, lokual ta trese oportunidatnan interesante pa organisashonnan lokal. Durante e Siman di Fondonan Oropeo, nos lo dediká mas atenshon na esaki tambe i kiko e adaptashonnan ta nifiká pa Kòrsou.
Hopi biaha sa tende e komentario serka organisashon i instansianan lokal, ku ta difísil pa logra risibí supsidio di fondonan Oropeo, komo ku e proseso pa apliká ta kompliká i burokrátiko. Durante e siman di informashon, lo para ketu na e punto aki tambe i lo tin un seshon spesial pa profeshonalnan ku ke profundisá mas den e práktika di aplikashon i maneho di proyekto finansiá ku fondo Oropeo. Tambe lo evaluá kaso di un organisashon lokal ku a hasi aplikashon, pero ku no a keda honrá; di moda ku e eksperensia akí por fungi komo un guia pa otro organisashonnan tambe. Di otro banda, lo elaborá tambe riba otro kasonan lokal ku sí tabatin éksito den aplikashon.
E Siman di Fondonan Oropeo ta primintí di bira un siman kargá ku informashon relevante pa tur organisashon i persona ku ke sa mas tokante e posibilidatnan di risibí supsidio for di fondonan Oropeo. Por haña mas informashon tokante e evento, riba e página di Facebook di EU Desk Curaçao òf por tuma kontakto ku EU Desk Curaçao via e-mail: eudeskcuracao@gobiernu.cw i tel: 462-1444 ext 150. Registrashon pa partisipá na e Siman di Fondonan Oropeo ta grátis.
