Publiká riba 04 Sèptèmber 2017
Diferente proyekto ku Obra Públiko ta tin plania pa e periodo aktual tin tardansa, pa motibu ku no tin bitumen. E tardansa ta okashoná ku un proyekto manera asfaltamentu dilanti Savonet i otro partinan di e kaminda di bai Wespen, ta stanká. Obra Públiko i e diferente kontratistanan ta lamentá e tardansanan i ta pidi komprenshon serka públiko ku ta hasi uso di e kamindanan no akabá.
Obra Públiko tambe ta tin planiá pa den fakansi kuminsá drecha situashon di seguridat den besindario di diferente skol i tambe drecha e lugá pa stashoná outo na Colon den Otrobanda. Tardansa den aprobashon finansiero i falta di bitumen a stroba e planifikashon. Pa evitá ku e besindarionan menshoná haña molèster di stòf ora kita e asfalt bieu miéntras no por pega asfalt nobo, a disidí pa warda ku e proyektonan te ora tin akseso na bitumen atrobe.
Bitumen ta nesesario pa mara asfalt. Ántes tabata usa breu pa hasi esaki, pero breu tin supstansianan agresivo pa salú di hende den dje. For di añanan 90 mundialmente ta usa bitumen, un restitushon di zeta krudo, na lugá di breu. Na Kòrsou mes ta traha bitumen, komo produkto èkstra di e sentral di BOO. Dor ku tin trabounan di renobashon na e planta di BOO, no tin sufisiente bitumen loke ta resultá den e tardansanan menshoná.
