Publiká riba 31 Yanüari 2023
WILLEMSTAD – Famia Real ta yega Kòrsou riba djárason 1 di febrüari 2023. Kòrsou ta e di tres país ku ta keda bishitá después di Boneiru ku Aruba, durante di nan bishita na Karibe. Esaki ta e promé biaha ku su Altesa Prinsesa Amalia ta hasi un bishita ofishal na e parti di Reino Hulandes den Karibe.
Riba djárason 1 di febrüari, su Mahestat Rei, su Mahestat Reina i su Altesa Real Prinsesa ta nabegá huntu for di Aruba pa Kòrsou riba e barku Zr.Ms. Holland. Komandante di Forsa Naval di Karibe, Brigada General Marítimo sr. Frank Boots ta guia e Famia Real. Durante di e biahe, Famia Real ta keda informá di tur e tareanan di Defensa den e region di Karibe. Tambe tin diferente delegashon abordo pa informá di e otro tareanan adishonal ku Marina Real ta ehersé den e área marítimo di Karibe.
Den e skema athunto por tuma nota di e programa na yegada pa dia 1 febrüari 2023:
| Orario | Aktividat |
| 16:00 | Demonstrashon pa Famia Real riba laman i den laira pa unidatnan di Warda Kosta Karibense. |
| 16:30 | 35 saludo seremonial (salva) komo homenahe i na honor di su Mahestat. |
| 16:45 | E barku di marina Zr.Ms. Holland ta drenta nos bahia di Santa Anna ku Famia Real abordo. |
| 17:00 | E barku di marina Zr.Ms. Holland ta mara na Mattheywerf |
| 17:30 | Di forma seremonial marítimo (overgefloten met de bootsmanfluit) ta anunsiá ku Su Mahestat Rei por baha for di e barku. Su Mahestat Rei, Su Mahestat Reina i Su Altesa Real Prinsesa ta keda risibí di forma ofishal pa Gobernador sra. Lucille George-Wout, Promé Minister di Kòrsou sr. Gilmar Pisas i Presidente di Parlamento sra. Charetti America-Fransisca. |
| OJO!! | Tene Kuenta ku Mattheywerf no ta aksesibel pa públiko! |
Tur habitante di Kòrsou ta kordialmente invitá pa presensiá yegada di Famia Real den bahia di Santa Anna. Esaki ta posibel for di e wafnan tantu na Punda komo Otrobanda, kaminda di forma festivo por yama bon biní nan Famia Real pa medio di p.e. banderitas.
Ta enkurashá tur kompania, tienda i demas organisashonnan na Kòrsou pa hisa bandera di Kòrsou i, posibelmente, bandera di Hulanda durante di bishita di Famia Real e tres dianan benidero.
Nota pa Redakshon: Tin un lugá speshal reservá pa prensa akreditá riba Mattheywerf. Pa haña akseso mester mèldu na komienso di e aktividat serka kolaborador di Komunikashon sr. Jaret Guanipa. Promé ku yegada di e barku mester sigui tur instrukshon di Marina den kuadro di seguridat. Pa pregunta relashoná ku Defensa Karibense, potrèt i video por tuma kontakto ku Teniente sra. Marinka Hiraldo Vos-van Kooten na + 599 9 685-3504.
