Publiká riba 21 Desèmber 2021
WILLEMSTAD – Representantenan di Gobièrnu, enkabesá pa Minister Presidente Pisas, a sinta ku mundu di farándula pa asina papia riba e situashon aktual i kiko posiblemente por introdusí komo medida pa limitá plamashon di e variante di e vírùs di COVID-19 ku yama Omicron. Tur aktividat farandulero por tuma lugá, pero entrante djaweps, 23 di desèmber 2021, eventonan grandi di mas ku 100 persona i bailamentu no por tuma lugá mas por lo pronto.
Gobièrnu a hasi tur loke ta na su alkanse pa evitá di tuma medida pa e mundu di eventonan di riesgo haltu di Kòrsou. Lástimamente e variante di Omicron a demostrá di no por pèrmití esaki ya ku e variante di e vírùs akí ta plama 2 te 3 biaha mas lihé. Ademas e bakuna aktual su efektividat pa ku e mésun variante akí a baha kual ta pone ku si pone tèstmentu na porta ku QR mes, tòg hende por bira malu ku e posibilidat pa keda hospitalisá. P’esei gobièrnu ta hasi tur loke ta na su alkanse pa amplia e posibilidat pa mas tantu hende posibel por tuma un booster di forma ku por alsa e defensa kontra di e variante.
Pues tur aktividat farandulero por sigui, pero lástimamente entrante djaweps, 23 di desèmber 2021, no por pèrmití eventonan riba 100 persona mas, ni eventonan bailabel, ni maske e evento tin ménos ku 100 persona. Gobièrnu di Kòrsou ta brinda e posibilidat pa yuda aliviá esnan den farándula ku a hasi nan invershonnan kaba ku sosten di i kontrol di SOAB pa asina purba fangu parti di e gastunan hasí kaba.
Mañan, djárason, 22 di desèmber, pa 11.30’or di mainta, Gobièrnu di Kòrsou lo anunsiá tur e otro medidanan nobo ku ta bai drenta na vigor for di djaweps próksimo.
