Fase 2 di rekonstrukshon di Suffisantweg a kuminsá - Informashon tokante Gobièrnu di Kòrsou Bo opinion

Notisia

Fase 2 di rekonstrukshon di Suffisantweg a kuminsá

Geplaatst op 10 April 2019 dor di Ministerio Tráfiko, Transporte i Planifikashon Urbano

Willemstad – Trabounan di infrastruktura semper por trese molèster pa habitantenan, komersiantenan, i usuarionan. Esaki ta e kaso sigur ora ku trabounan ta tuma hopi tempu pa finalisá. Den esaki ta importante pa nos keda kòrda riba e meta i e final di e proyekto. E final ta un kaminda drecha i un kaya seif pa tur hende. Den kaso di Suffisantweg, trabounan di mantenshon a kuminsá for di den desèmber di 2018 i ainda no a terminá. Servisio pa Obra Públiko (OW) a anunsiá e tempu aya, ku e trabou lo dura te ku aprel di 2019. Pero ta komprendibel ku pa esnan den besindario di e trabounan, e por parse un eternidat.

Mirando esaki, Minister Jesus-Leito huntu ku Servisio pa Obra Públiko (OW) ta trahando duru pa finalisa e proyekto aki mas pronto ku ta posibel. E promé fase di trabounan aenserá kita e asfalt bieu, pone kapa di asfalt nobo, drecha alsera, i pone ‘middenberm’ pa gran parti di Suffisantweg. Awor falta ainda fase 2 ku ta for di e entrada di Suffisantweg na Schottegatweg te ku e krusada na Suffisantweg / Kaya J.M. Pinedo / Tia Juanaweg. E parti aki lo dura te ku fin di aprel. Gran parti di e kaya ya ta habri pa outomobilistanan.

OW ta evaluá e trabounan regularmente pa sòru ku tur kos ta kana korekto i ta hasi ahuste kaminda ta nesesario. Den kaso di Suffisantweg, lo evaluá kon e kaya a keda i si mester drecha, lo drecha tambe tratando pa kousa ménos molèster posibel i finalisando den un tempu rápido.

Minister Jesus-Leito huntu ku OW ta pidi tur habitante, komersiante i usuario, pa tene un poko pasenshi mas. Ku pasenshi nos lo gana gloria.

Tambe ta pidi pa tene kuenta ku desviashonnan di tráfiko. Kore ku koutela. OW ta gradisí komunidat i habitantenan pa e pasenshi durante ehekushon di e trabounan aki.

Si tin pregunta of kualke preokupashon, por tuma kontakto ku Ministerio di VVRP via di email info.vvrp@gobiernu.cw of via di Whats app na +5999 5118582.

Ministerio konserní