Publiká riba 15 Yanüari 2019
Na promé lugá, komo Minister di Enseñansa, Siensia Kultura i Deporte mi ta deseá Pueblo di Kòrsou un felis aña 2019 yená ku pas, produktividat i seguridat.
Den e aña aki pueblo tin e privilegio un biaha mas pa eksperensiá Kòrsou su kultura riku i diverso. Kultura ta un di e pilánan esensial pa konstruí nos nashon (‘nation building’).Ta di importansia pa nos fortifiká nos propio identidat i balornan propio, poniendo énfasis riba nos historia i kultura. Ora nos konosé nos historia i kultura, nos ta deskubrí nos potensia komo un nashon i por skohe konsientemente pa e lokual ku ta hasi nos fuerte. Di e forma aki huntu nos ta realisá e nashon ku nos ta deseá.
Aktualmente nos maneho kultural, ta pone énfasis riba Union den Diversidat. Nos historia riku ta duna un refleho bibu di e mosaiko kolorido i diverso di gran balor ku nos tin. Kòrsou su komunidat ta konsistí di diferente nashon, rasa, kultura ku ta meskla ku otro.
Gobièrnu ta pone énfasis riba e tradishonnan ku ta mara nos huntu, pa konsolidá i fortifiká nos lasonan ku otro. Den kuadro di ‘nation building’ gobièrnu aktualmente ta pone e aksènt riba e siguiente prioridatnan:
a. konsientisashon di nos komunidat di nos historia riku den e konteksto korekto;
b. promoshon di ekspreshon kultural;
c. promové mas arte i kultura den nos skolnan.
Aña 2019 a keda ofisialmente deklará komo e aña di e piano di silinder: Aña di kaha di Òrgel. Banda di esaki ta importante pa nos pone atenshon i reflehá riba un otro parti esensial ku ta forma parti di nos herensia kultural; kual ta “Tumba”. Ta #huntu nos bib’é i alabes tené BIBU. E echo ku Gobièrnu di Kòrsou na 1970 a bai di akuerdo pa e ritmo di Tumba bira e ritmo ofisial di Karnaval, ta pa motibu ku Gobièrnu ta duna importansia na un ritmo lokal outéntiko i ku nos mester ta orguyoso di dje. Festival di Tumba durante 49 aña a demostrá su derecho di eksistensia i ta notabel e interes inmenso ku medionan di publisidat, músikonan i pueblo en general ta eksponé pa e aktividatnan promé, durante i despues di Festival di Tumba.
For di 2018 Gobièrnu di Kòrsou a tuma e desishon pa partisipá komo “Branding Partner” den Festival di Tumba, pa asina yuda garantisá eksistensia i promoshon di nos Tumba komo herensia musikal intangibel. Gobièrnu su empeño ferviente ta pa e ritmo di nos Tumba zona ku frekuensia haltu durante e aktividatnan di Karnaval, ya ku nos Festival di Tumba i e diferente aktividatnan di Karnaval ta krusando frontera i ta yegando den tur skina di mundu serando konosí ku diferente faseta di nos kultura. Ku nos ritmo di Tumba nos por identifiká nos mes i por distinguí nos mes for di otro paisnan kaminda tin aktividatnan karnavalesko.
Ta #huntu nos tur tin e responsabilidat pa laga nos Tumba keda bibu pa asina hasi e traspaso pa e siguiente generashonnan. Gobièrnu ta konvensí ku AMAK i su miembronan e aña aki un biaha mas ta presentá un bankete di komposishonnan nobo di tumba pa deleitá e pueblo di Kòrsou i mundu kompleto!
E echo ku tur aña durante festival di tumba por nota ku hóbennan ta partisipá komo músiko, kompositor, kantante o areglista, ta un garantia ku Festival di Tumba su futuro ta garantisá. E músikonan profeshonal ku a studia músika na nivel elevá tambe a yuda engrandesé nos Festival di Tumba. Laga nos kada un sigui balorá i karga nos artistanan ku ta ekspresá nan kreatividat líriko i rítmiko.
Gobièrnu ta deseá direktiva di AMAK i su tim, kolaboradornan i tur músikonan partisipante, un Festival di Tumba 2019 koutivador i eksitoso. Laga e desishon di hurado karga nos tur su aprobashon i duna rèspèt na e tumba ganador. #HUNTU nos ta laga e Tumba zona i resoná BIBU BIBU.
