Publiká riba 22 Yüli 2020
WILLEMSTAD – Despues di un Siman di “Fòrtí Habrí” yená ku informashon via medionan di komunikashon, Gobièrnu di Kòrsou ta sigui informá komunidat, pero awor den un bachi nobo: “Fòrti Habri – Awor mas serka di komunidat”. Djamars 21 di yüli a toka turno na e kongregashon di House of Worship pa dialogá ku mandatarionan i haña kontesta riba vários pregunta den kuadro di e situashon aktual di pais. E seshon a konsistí di un pènel di Promé Minister Eugene Rhuggenaath, Minister Steven Martina, Minister Zita Jesus-Leito, Minister Armin Konket, Minister Quincy Girigorie i Minister Kenneth Ghijsbertha. Personanan presente por a dirigí nan preguntanan direktamente na e ministernan i asina ekspresá nan preokupashonnan, pero alabes duna sugerensianan balioso. Na final di e anochi a klousurá ku orashon pa gobernantenan i tambe pa progreso di pais Kòrsou.
Durante e siman benidero, Gobièrnu di Kòrsou lo sigui tene diferente enkuentro similar ku diferente gruponan den nos komunidat, manera entre otro kongregashonnan religioso, ‘young professionals’ i gruponan di servisio. E meta prinsipal ta pa dialogá di un forma direkto i konsiso ku lo yuda trese klaridat den komunidat pa ku tópikonan relevante den e situashon aktual di pais. Tur esaki den un esfera ménos formal ku ta kustumbrá i mas personal. Di e forma aki Gobièrnu di Kòrsou ta duna oido na e petishon di komunidat pa mas informashon i mas transparensia.Mas detaye tokante e siklo di informashon di Fòrti Habrí lo keda komuniká via e kanalnan ofisial di Gobièrnu di Kòrsou i bo media preferí.
