Publiká riba 13 Aprel 2026
WILLEMSTAD – Djabièrnè, 10 di aprel 2026, Gabinete Pisas III a revelá ofisialmente un banki artístiko na honor di èks Gobernador Lucille George-Wout. E seremonia a tuma lugá den presensia di entre otro, Gobernador Mauritsz de Kort, Promé Minister Gilmar Pisas, miembronan di Konseho di Minister, Presidente di Parlamento Fergino Brownbill huntu ku algun Parlamentario, i otro invitadonan. E seremonia tabata den un esfera solèm alabes kultural.
Di robes pa drechi: èks Gobernador Lucille George-Wout, Minister Charles Cooper, ‘Minister van Staat’ Emily de Jongh-Elhage, Minister Charetti America-Francisca, Gobernador Mauritsz de Kort, Promé Minister Gilmar Pisas, señor Herman George, Minister Roderick Middelhof.
E banki ta un kreashon di Giovanni Abath (7.1) i ta forma un homenahe duradero di parti di Gabinete Pisas III, komo rekonosementu di Sra. George-Wout su periodo di diesdos aña komo Gobernador di Kòrsou. E obra di arte ta konsistí di 626 sírkulo, ku ta referí na e 626 siman (12 aña i 2 siman) ku señora George-Wout a ehersé e funshon. E sírkulonan ta simbolisá kompromiso, kontinuidat i union.
Giovanni Abath (7.1) huntu ku èks Gobernador Lucille George-Wout i Promé Minister Gilmar Pisas.
E banki ta trahá di metal (‘stainless steel’) i marmer pretu. E tin forma di un korona ku ta referí tantu na Reino Hulandes komo na e manera digno ku señora George-Wout a ehersé e funshon di Gobernador. E kombinashon di pretu i blanku ta simbolisá inklusividat, miéntras ku e aparensia transparente ta representá transparensia komo balor pa gobernashon demokrátiko.
E banki ta situá na ‘Gouvernementsplein’ den Punda na unda tur hende den nos komunidat por sinta riba dje i apresiá e bista riba Palasio di Gobernador.
