Gerensia di SDKK ta atendé seriamente ku Covid-19 - Informashon tokante Gobièrnu di Kòrsou Bo opinion

Notisia

Gerensia di SDKK ta atendé seriamente ku Covid-19

Geplaatst op 31 March 2021 dor di Ministerio Hustisia

WILLEMSTAD – Resientemente gerensia di prizòn a tuma nota di un informashon inkorekto ku ta sirkulá den medionan di komunikashon, enkuanto di e situashon di Covid-19 den prizòn.

Gerensia di prizòn ta informá ku tin atenshon debido pa ku e situashon di Covid-19 i ta tuma esaki na serio. Gerensia di SDKK a bin ta traha estriktamente, konforme prosedura i rekomendashon ku Gobièrnu di Kòrsou a stipulá. Alabes gerensia ta gradisí e personal di SDKK ku ta dunando nan aporte den kuadro di Covid-19 diariamente.

Mas aleu gerensia di prizòn a deliniá su maneho for di momento ku a konstatá e promé kaso den nos komunidat na mart 2020. Nos personal i klientenan a sigui e maneho akí; nos por tabata orguyoso ku no tabatin ningun kaso positivo den e instituto.

Relashoná ku eskalashon di Covid-19 den nos komunidat na e momento akí, nos ta informá ku nos a konstatá e di 3 kaso positivo bou di nos klientenan, kende, segun prosedura, ta trasladá pa e área di isolashon. Pa sigui mantené e kuido di nos klientenan i personal di prizòn, gerensia ta rekordá diariamente pa mantené na e reglanan vigente i alabes a pone material- i produktonan di higiena disponibel. Tur kliente di SDKK a risibí tapaboka den kuadro di protekshon personal. 

Finalmente, gerensia di prizòn ta partisipá ku e trayekto di bakunashon na Sentro di Detenshon i Korekshon Kòrsou a kuminsá, i den dianan benidero lo duna informashon tokante e trayekto akí na tur kliente i e personal di SDKK.

 

Ministerio konserní