Gobernador di La Guajira, Riohacha, Colombia sr. Wilson Rojas Vanegas a yega Kòrsou. - Informashon tokante Gobièrnu di Kòrsou

Notisia

Ministerio konserní Enseñansa, Siensia, Kultura & Deporte
 

Gobernador di La Guajira, Riohacha, Colombia sr. Wilson Rojas Vanegas a yega Kòrsou.

Publiká riba 20 Mei 2019

Willemstad – Resientemente Gobièrnu di Kòrsou a risibí Gobernador di La Guajira Colombia sr. Wilson Rojas Vanegas ku a yega Kòrsou den e kuadro di estrecha lasonan di hermandat riba diferente área di maneho entre nan komersial, edukashonal i kultural. Minister di Finansa sr. K. Gijsbertha i Minister di Enseñansa, Siensia, Kultura & Deporte sra. M. Alcalá-Wallé a forma parti di e komishon di bon bini pa buska Gobernador Wilson Rojas Vanegas na aeropuerto Hato.

Den kuadro di bishitanan anterior di nos Ministernan na Riohacha vários MOU a keda firmá kaminda awor nos por tuma nota di trayektonan ku tin huntu ku La Guajira. E meta di e bishita ta primeramente ku próksimamente lo yega Kòrsou e promé lancha/barku SAMURAI ku berdura i fruta for di La Guajira. Esaki lo ta e momentu históriko kaminda lo hasi e seremonia i entrega di e promé merkansianan na e pueblo di Kòrsou.

E bishita di e Gobernador W. Rojas Vanegas  na nos pais a keda prepará pa Ministerio di Desaroyo Ekonómiko, Ministerio di Salubridat, Medio Ambiente & Naturalesa i Ministerio di Enseñansa, Siensia, Kultura & Deporte den koperashon tambe ku Kas di Kultura Kòrsou. Huntu nan tin un team kordinadó ku a prepará un programa kaminda lo tin aktividatnan ku ta promové e parti ekonómiko, salubridat i tambe e interkambio kultural. Durante di e siman benidero Gobièrnu di Kòrsou lo tin vários aktividat kaminda kada un di e ministerionan ariba menshoná lo hasi diferente bishitanan i tene reunionnan importante ku e meta pa stimulá e interkambio den tur sentido di palabra pa asina nos estrechá e laso di hermandat entre otro riba área komersial i kultural entre e ambos paisnan.

****************************************
*Riba e potrètnan athunto por tuma nota di Minister di Finansa sr. K. Gijsbertha i Minister di Enseñansa, Siensia, Kultura & Deporte sra. M. Alcalá-Wallé huntu ku Gobernador di La Guajira, Riohacha, Colombia sr. Wilson Rojas Vanegas i su delegashon na yegada na Kòrsou i tambe na un aktividat di Bon Bini.