Publiká riba 11 Ougùstùs 2016
Willemstad- Konseho di Minister a bai di akuerdo pa kompensá e grupo di AOV’r ku durante di e periodo di 1 mart 2014 pa 1 di mart 206 a hasi uso di e areglo di transishon pa kobra nan penshun di behes (AOV) promé ku nan a yega 65 no opstante e redukshon di 6% pa aña riba nan penshun di behes.
Ta trata di personanan ku a entrega nan petishon na SVB, pa for di nan 60 aña risibí nan pago di penshun di behes. A apliká un redukshon di 6% pa aña riba e penshun di behes. Por a hasi petishon pa e areglo di transishon entre 1 di mart 2014 pa 1 di mart 2016.
Alrededor di 4.800 persona entrega un petishon entre 1 di mart 2014 i 1 si mart 2016 pa risibi nan pago di penshun di behes ku e redukshon aki. En rason ku a pisa hopi den yega na e desishon pa kompensá e grupo aki ta e echo ku un parti di nan no tin otro fuente di entrada ku no ta nan penshun di behes. Banda di esaki a resultá ku algun di nan a hasi petishon for di mart 2014 pa tuma nan penshun di behes i komo tal a risibí un redukshon máksimo (di 30%.)
Danki na e esfuersonan ku komunidat a hasi durante di e último añanan a krea espasio pa por suavisá efektonan negativo ku e reforma a trese kuné. E redukshon di 30% riba e derecho di penshun di behes lo keda redusí pa e grupo aki te nan 20% i e grupo di persona aki lo risibí pago di esaki ku forsa retroaktivo riba e periodo tras di lomba.
Ministerio di Finansas den koperashon ku Ministerio di SOAW lo perkurá pa ehekushon di esaki.
