Gobièrnu ta publiká registro di amtenarnan ku tin outorisashon pa firmá - Informashon tokante Gobièrnu di Kòrsou

Notisia

Ministerio konserní Finansa
 

Gobièrnu ta publiká registro di amtenarnan ku tin outorisashon pa firmá

Publiká riba 31 Mart 2014

Willemstad – Pa kumplí ku Lei di Konsenso di Reino, gobièrnu ta kumisá publiká lista di amtenarnan ku tin outorisashon pa firmá. Minister di Finansa ta mantené un registro ku nòmber i funshon di amtenarnan ku tin outorisashon di firmá, ku ta komprometé gobièrnu ku un obligashon finansiero.

Komprometé gobièrnu ta sosode por ehèmpel na momentu ku a base di desishon un amtenar firmá un bestelbon pa un kompania entregá produkto i/o duna servisio na gobièrnu. Pa gobièrnu ta hopi importante pa e kompania ta na altura di  amtenar ku ta outorisá pa firmá. Pa medio di e firma aki e amtenar ta mará gobièrnu finansieramente.

Pa aklarashon mester bisa ku pa téknikamente por tin kòntròl riba separashon di kada funshon ku un amtenar ta ehersé, ta preferá di mira sierto funshon separá di otro. Atrabes di separashon di funshon ta krea un mihó bista riba interes kontradiktorio  pa por manehá prosesonan funshonal i asina evitá oportunismo.

E funshonnan ku kier mira separá ta:
E funshon ku ta disponé di outorisashon pa firmá: e ta duna tarea, den e kaso aki, ta mara gobièrnu na un terser partido.
E funshon ku ta warda bienes: e ta warda bienes i ta entregá bienes na e funshon ku tin outorisashon pa firmá.
E funshon ku ta registrá: e ta registrá enkargo, distribuí konfirmashon di ehekushon den e sistema atministrativo finansiero outomatisá, pues henter e proseso di manehá i ehekutá servisio di gobièrnu.
E funshon ku ta kontrolá: e ta kompará datos den e sistema atministrativo finansiero ku realidat i tambe kontrolá i inbestigá ku kumplimentu ku lei i regla a tuma lugá.
E funshon ku ta ehekutá: e ta ehekutá un enkargo pa e funshon ku tin outorisashon pa firma.

E registro ta kontené siguiente dato: te kua montante por firma pa bia i pa kua akto nan ta outorisá pa firmá ku tin konsekuensha pa lei. Gobièrnu ta publiká e registro despues di kada kambio, pero en todo kaso ta publiká un ‘update’ kada 6 luna. Publikashon di e registro ta tuma lugá riba website di gobièrnu riba página di Ministerio di Finansa.