Publiká riba 13 Mei 2020
For di 15 di aprel último Konseho di Minister a disidí ku ta suspendé pago di tret salarial (loontrede) na e empleado públiko te próksimo aviso. E situashon finansiero, e realidat ekonómiko i tambe sosial di pais a empeorá drástikamente debí na medidanan ku Gobièrnu mester a tuma pa salbaguardiá salubridat públiko relashoná ku e menasa di COVID-19.
Ku e desishon di e ‘lockdown’, Gobièrnu a premirá ku e konsekuensianan lo a bira un desafio tantu den e área di desempleo komo den e área di finansa gubernamental. Gobièrnu no únikamente mester tene kuenta ku interesnan di su empleadonan, pero tambe e interes general ku ta pa promové rekuperashon di ekonomia, baha desempleo i duna sosten finansiero na esnan mas vulnerabel den komunidat.
E responsabilidatnan menshoná a pone ku Gobièrnu mester a skohe entre atendé e situashon di deterioro di pobresa di pais i e pago na tempu pa prestashon di su empleadonan den su posishon komo dunadó di trabou.
E fecha riba kua Gobiernu por paga e tret salarial aki ta keda pendiente. Na momentu di hasi entrega di presupuesto 2021 na Parlamento, por tin un mihó bista riba e posibilidatnan di Gobièrnu pa paga e tret salarial.
