Gobièrnu a firma akuerdo ku 9 organisashon pa nan manehá e fasilidatnan deportivo - Informashon tokante Gobièrnu di Kòrsou Bo opinion

Notisia

Gobièrnu a firma akuerdo ku 9 organisashon pa nan manehá e fasilidatnan deportivo

Geplaatst op 21 September 2020 dor di Ministerio Enseñansa, Siensia, Kultura & Deporte

WILLEMSTAD — Djasabra 19 di sèptèmber 2020 a tuma lugá firmamentu di e siguiente shete (7) akuerdonan ku organisashonnan ku a pasa un proseso di revishon i aprobashon: Fundashon Real Buena Vista, Fundashon Desaroyo Deportivo Kòrsou, Fundashon Terenonan Deportivo Santa Maria (Heintje Kool), Plataforma Bandariba pa Kas Kòrá Nobo, CB4 Foundation, Fundashon Joshua Brenet i Asosashon Deportivo Rising Trotters. Firmamentu di e akuerdonan a tuma lugá den forma di un “drive thru” pa tene kuenta ku medidanan di COVID-19. Gobièrnu di Kòrsou tambe a firma anteriormente ku Cirilio Chirino Ballpark i Fundashon Progreso Marie Pampoen ku ta suma un total di 9 organisashon ku ta bai manehá e fasilidatnan deportivo.

Gobièrnu pa medio di Ministerio di Enseñansa, Siensia, Kultura i Deporte i Ministerio di Tráfiko, Transporte i Planifikashon Urbano, a start ku un trayekto pa yega na un maneho nobo pa atendé ku fasilidatnan deportivo. Konforme e maneho nobo Gobièrnu ta bai sera akuerdo di maneho ku organisashonnan ku ta bini na remarke pa hasi esaki segun un lista di kriterio. Sektor Kultura & Deporte a kana e trayekto akí ku un inventarisashon di e fasilidatnan i seguidamente a organisá un periodo di inskripshon kaminda tur organisashon por a inskribí. Esaki a tuma lugá entre 10 i 24 di yanüari 2020.

E organisashonnan ku a bini na remarke pa sera un akuerdo, a risibí un tayer organisá pa Sektor Kultura & Deporte den koperashon ku Fundashon Desaroyo Deportivo Kòrsou (FDDK) den luna di yüli i ougùstùs 2020. Den e tayer akí a trata kontenido di e akuerdo di maneho i a trata aspektonan manera plan di aktividat, plan di mantenshon i eksplotashon, plan di diseño di e fasilidat i e forma di responsabilisá e parti finansiero. E akuerdo di maneho tin un durashon di sinku (5) aña ku posibilidat pa renobashon.
Den e 7 akuerdonan ku a keda firmá riba djasabra tambe tin profeshonalnan den deporte yu di tera i/òf yu di mayornan yu di Kòrsou ku a skohe pa invertí den nos pais. Tin algun deportista profeshonal yu di tera mas ku a inskribí. Djasabra a toka turno na e dos promé nan ku ta Wladimir “Coco” Balentien i Joshua Brenet. Den futuro lo sera akuerdo ku mas deportista yu di tera ku tambe lo bai haña oportunidat pa manehá i invertí den e ramo di deporte.

Pa mas informashon di tur e organisashonnan ku a firma akuerdo bishitá e link aki: Anekso – Gobièrnu a firma akuerdo ku 9 organisashon pa nan manehá e fasilidatnan deportivo

Gobièrnu ta deseá tur e organisashonnan ku a tuma rienda di kanchanan hopi éksito i ta konta ku ta hasi esakinan asesibel pa nan bario spesífiko i pueblo di Kòrsou kompleto. Ku e desaroyo akí Gobièrnu di Kòrsou ta stimulá un maneho aktivo di fasilidatnan deportivo na benefisio di desaroyo di deporte den bario i henter nos pais.

** riba e fotonan athunto por tuma nota di e momentu kaminda Ministernan sr. E. Rhuggenaath i sra. Z. Jesus-Leito a tene konferensia di Prensa i tambe a firma e akuerdo den forma di ‘drive thru’ na SDK.

Ministerio konserní