Gobièrnu a hasi entrega di Premio Cola Debrot na Philip ‘Fifi’ Rademaker - Informashon tokante Gobièrnu di Kòrsou Bo opinion

Notisia

Gobièrnu a hasi entrega di Premio Cola Debrot na Philip ‘Fifi’ Rademaker

Geplaatst op 08 October 2021 dor di Ministerio Enseñansa, Siensia, Kultura & Deporte

WILLEMSTAD – E premio Cola Debrot a keda entregá na sr. Philip (Fifi) Rademaker na Lanthùis Savonet dia 1 di òktober 2021 pa su esfuersonan grandi hasí riba tereno literario. Promé Minister Pisas i Minister van Heydoorn enkargá ku Kultura a hasi e entrega.

Premio Cola Debrot ta un premio riba tereno kultural ku for di 1968 ta keda otorgá na un persona òf organisashon ku a hasi trabounan meritorio riba tereno di arte. E diferente kategorianan di arte ku ta keda premiá ta: arkitektura, arte visual, baile, folklor, literatura, músika, teater òf siensia. E aña akí a toka turno na e kategoria di “Literatura”.

E proposishon pa otorgá Premio Cola Debrot ta keda hasí pa Konseho Kultural Kòrsou ku tur aña di nobo ta instituí un komishon independiente pa skohe ganador di e prestigioso premio. E aña akí entrega di e premio no a logra tuma lugá riba 4 di mei (fecha natal di Cola Debrot) pa motibu di sirkunstanshanan di COVID-19 i “lockdown”. Premio Cola Debrot ta konsistí di un boton di oro representando e flor di Laraha, un sertifikado i un suma.

Promé Minister tabatin e honor di pega e boton di oro i Minister di Enseñansa, Siensia, Kultura i Deporte a hasi entrega di e ‘oorkonde’. Gobièrnu ta yama Konseho Kultural Kòrsou huntu ku tur ku a partisipá den e trayekto akí, danki pa nan esfuerso i ta felisitá sr. Philip (Fifi) Rademaker ku e logro akí. Alabes gobièrnu ta pidi pa huntu ku nos mes hendenan nos sigui stimulá i guia nos komunidat pa amplia i elevá nos konosementu pa medio di literatura.

Pa mas potrèt por bishitá página: Facebook di Ministerio di ESKD

 

Ministerio konserní