Gobièrnu a instalá grupo di trabou Teatro Nashonal ‘Ced Ride’
Publiká riba
21 Òktober 2021
WILLEMSTAD – Gobièrnu di Korsou a instalá un komishon di trabou pa traha riba e proposishon pa yega na Teatro Nashonal ‘Ced Ride’. Minister di Enseñansa, Siensia, Kultura i Deporte sr. Sithree ‘Cey’ van Heydoorn i Minister di Tráfiko, Transporte i Planifikashon Urbano sr. Charles Cooper a firma na nòmber di Gabinete Pisas e ordenansa den presensia di e miembronan ku a keda instalá.
E miembronan ta:
- Presidente di Konseho Kultural Kòrsou, sr. Andrey Pichardo;
- Presidente di Fundashon Amigunan di ‘Ced Ride’, sr. Christian Peterson;
- Un miembro di Konseho Kultural Kòrsou, sr. Micheal Newton;
- Direktor di Sektor di Kultura i Deporte òf un persona nombrá den representashon di Ministerio di Enseñansa, Siensia, Kultura i Deporte;
- Direktor di Infrastruktura i Planikfikashon Urbano òf un persona nombrá den representashon di Ministerio di Tráfiko, Transporte i Planifikashon Urbano.
E komishon tin komo tarea pa traha riba puntonan di salida pa bin ku un proposishon pa ku konstrukshon i finansiamentu di un Teatro Nashonal Ced Ride, teniendo kuenta ku e maneho di gobièrnu i e maneho di Kultura 2021-2025. Tambe nan a keda enkargá ku e tarea pa bin ku un struktura finansiero pa ku invershon kaminda organisashonnan partikular por yuda den e trayekto akí. Na mes momento pa traha riba un dokumento vishonario ku ta enserá proposishonnan konkreto pa kristalisahon di e Teatro Nashonal ‘Ced Ride’.
** Riba e pòrtrètnan athunto por tuma nota di e momentu ku Minister van Heydoorn i Minister Cooper a firma i hasi entrega di e ordenansa na e Grupo di Trabou Teatro Nashonal ‘Ced Ride’.
