Gobièrnu amplia akseso di komunikashon ku komunidat - Informashon tokante Gobièrnu di Kòrsou Bo opinion

Notisia

Gobièrnu amplia akseso di komunikashon ku komunidat

Geplaatst op 23 March 2020

Willemstad – Gobièrnu di Kòrsou ta sigui hasi mas esfuerso pa amplia su akseso di komunikashon na komunidat. P’esei for di djaluna 23 di mart 2020, ta reintrodusí INFO84 (ántes kanal 84) riba Flow i TDS. Ademas, ta introdusí LIÑA 9320 ku ta un liña di telefòn ku tur hende por yama pa hasi pregunta relashoná ku Corona Vírùs. 

INFO84

Na 2012 Gobièrnu a introdusí kanal 84 i na komienso di 2019 esaki a bira inaktivo pa asina un revishon tékniko intensivo por a tuma lugá. Ademas, mester a traha riba un struktura nobo di kontenido pa asina por a reintrodusí esaki. No por tin un mihó momento pa reintrodusí esaki ku no ta den e periodo di krísis aki. P’esei Gobièrnu, den su afán pa amplia su akseso di komunikashon na komunidat, ta reintrodusí INFO84, loke nos tabata yama antes, kanal 84. INFO84 no ta un stashon di televishon. Info84 ta un kanal riba Flow i TDS, manehá pa Direktorado di Komunikashon di Gobièrnu di Kòrsou. E lo fungi komo un kanal di komunikashon, meskos ku otro kanalnan di komunikashon, manera Facebook, WhatsApp i website. INFO84 ta drai 24 ora pa dia, 7 dia pa siman. Riba Info84 tur siudadano por haña e oportunidat pa sigui desaroyonan riba e tema Corona Vírùs den su profundidat. Ta ripití Konferenshanan di Prensa, ta pasa produkshonnan ku ta mustra kon prevení e vírùs i lo duna informashon riba tur e ultimo desaroyonan ku tin tokante Corona Vírus.

LIÑA9320

Hopi siudadano tin pregunta riba temanan relashoná ku Corona Vírùs i pa por duna kontesta riba eseinan, Gobièrnu di Kòrsou a amplia su servisio di asistensia ku introdukshon di LIÑA9320. Esaki ta un number ku siudadanonan por yama pa asina informá nan mes ku solamente pregunta riba relashoná ku Corona Vírùs. E number ta funshona di 1’or pa 5’or di atardi.

E servisionan di asistensia riba www.gobiernu.cw, WhatsApp 5640440 i página di Facebook di

Gobièrnu Kòrsou ta keda mesun aktivo pasó ora hende ta bon informa nan por aktua di moda ku nan ta bon protehá di e malesa Covid-19, mihó konosí komo Corona Vírùs.

 

Ministerio konserní