Publiká riba 08 Ougùstùs 2019
WILLEMSTAD – Gobièrnu di Kòrsou ta bai informá komunidat na un manera transparente i detayadamente tokante e Akuerdo di Kresementu (mihó konosí komo Groeiakkoord). Lo informá tokante e ahustenan i tambe e perspektivanan positivo ku esaki ta enserá.
Entretantu Gobièrnu a tuma nota di basta informashon inkorekto i for di balanse tokante e Akuerdo di Kresementu ku na e momentunan akí ta sirkulando riba retnan sosial. Gobièrnu ta aseptá ku por tin diferente opinion tokante e Akuerdo di Kresementu, i ta honra tambe e derecho di por protestá den nos pais demokrátiko. Nos mester ta orguyoso ku nos pais tin e derechonan akí. Pero Gobièrnu no ta haña aseptabel ku ta malinformá pueblo pa generá sosten pa protestanan i ku pa medio di esei kisas por krea pániko bou di pueblo.
Hopi di e informashonnan ku ta sirkulá riba retnan sosial no ta òf parsialmente no ta kuadra ku realidat. E forma ku ta tres’é dilanti ta konfuso i pues ta duna informashon robes na komunidat. Gobièrnu di Kòrsou ta lamentá ku di forma inkompleto i íresponsabel ta publiká informashon tokante ahustenan ku por ferwagt.
Konsekuentemente, Gobièrnu ta hasi un apelashon na un-i-tur pa keda alèrt i no asumí kualke informashon ku ta sirkulá sin mas. Gobièrnu ta konsiente ku sierto ahuste lo por trese dolónan, pero Gobièrnu lo komuniká habrí i transparente tokante e ahustenan. Tambe lo vigilá pa e efektonan no tin un impakto demasiado grandi riba nos siudadanonan. Ademas Gobièrnu ta sigurá di trese balanse dor di bini tambe ku ahustenan ku netamente ta brinda perspektivanan positivo pa nos komunidat.
Gobièrnu ke urgi komunidat pa sigui informá su mes via e kanalnan ofisial di Gobièrnu di Kòrsou pa informashonnan korekto ku lo sali, pa medio di e página di Facebook Gobièrnu di Kòrsou, via WhatsApp 564-0440 òf website www.gobiernu.cw.
