Gobièrnu di Kòrsou a reuní ku gerensia di Aqualectra - Informashon tokante Gobièrnu di Kòrsou Bo opinion

Notisia

Gobièrnu di Kòrsou a reuní ku gerensia di Aqualectra

Geplaatst op 13 December 2020 dor di Ministerio Asuntunan General i Promé Minister

Willemstad- Durante e siman tras di lomba, pueblo di Kòrsou a eksperensiá no menos ku tres (3) ‘blackout’ i algun bario por a sinti interupshon temporal tambe den suministro di awa. Gobièrnu di Kòrsou tin total komprenshon pa e iritashon kousá pa e molèster ku situashonnan asina ta trese kuné i tambe pa e daño material ku posiblemente algun kliente di Aqualectra por a eksperensiá komo konsekuensia di esaki.

Komo e kompania responsabel pa suministro di awa i elektrisidat aki na Kòrsou, Gobièrnu di Kòrsou a reuní ku gerente di Aqualectra riba djadumingu, 13 di desèmber. Meta di e reunion aki tabata, pa Gobièrnu por haña mihó bista kiko tabata e kousa di e instabilidat den suministro di awa i koriente den e siman tras di lomba pero tambe pa optené informashon aserka si pueblo por konta ku Aqualectra a yega na stabilidat pa por sigurá e suministro kustumbrá.

Aparte di a reuní ku Aqualectra, Gobièrnu a aserka tambe instansianan den e organisashon di kalamidat (RBO) pa hasi un inventarisashon kua ta tur e áreanan ku por tin molèster i/òf peliger komo konsekuensia di e ‘black-out’ nan ku a tuma lugá. Por pensa aki riba seguridat di suministro pa hospital, kasnan di kuido i otro institutonan vulnerabel. Tambe a para ketu riba e ròl importante di Servisio Meteorológiko den esaki, mirando ku e servisio ya tin eksperiensia den hèndel situashonnan kaminda no tin awa i koriente, por ehèmpel despues di un orkan.
Gobièrnu ta mira e seriedat den e situashon aki i lo sigui monitòr e avansenan di aserka.

Ministerio konserní