Publiká riba 25 Òktober 2023
WILLEMSTAD – Di 25 pa 27 di òktober 2023, Gobièrnu di Kòrsou huntu ku Sektor Privá – bou di kordinashon di Direktorado di Komunikashon i Informashon – ta organisá e promé konferensha tokante komunikashon titulá “Communication & Media Summit”. Di forma impaktante a tuma lugá apertura di e ‘Summit’ riba djárason 25 di òktober, kaminda Minister di Desaroyo Ekonómiko, sr. Ruisandro Cijntje, a habri e “Summit” den presensia di mas ku 200 partisipante. Aserka sra. Angie Eason ku a bini spesialmente for di Texas, Merka, a duna un diskurso interesante tokante evolushon di komunikashon den transkurso di tempu.
“Communication & Media Summit” ta un evento di 3 dia ku ta dirigí su mes riba ekspertonan di komunikashon, media i merkadeo, pero tambe mènedjer, direktornan, profeshonalnan den Rekurso Humano i empresarionan di tantu sektor públiko komo privá. Meta primordial di e summit akí ta pa trese sektor públiko i sektor privá pa asina desaroyá krea un interakshon real entre e sektornan pa asina alsa transparensha i influenshá manehonan positivamente. Ademas e meta ta pa krea un plataforma kaminda partisipantenan por eskplorá e mundu dinámiko di komunikashon, merkadeo i media, i asina kompartí nan konosementu, desaroyá abilidatnan i nètwèrk ku otro.
E meta akí ta kuadra ku e diferente esfuersonan ku Gobièrnu a bin ta hasi pa – a traves di su Programa di Gobernashon i Plan Stratégiko di Komunikashon – keda amplia i mehorá e komunikashon ku siudadanonan i diferente gruponan di interes, tantu interno komo eksterno. Ademas, dor di traha huntu ku sektor privá a base di un ‘public-private partnership’, ta boga pa alsa e posishon di Komunikashon, Merkadeo i Media komo profeshon den nos komunidat i asina logra mas impakto den e área profeshonal. Intenshon den e kaso akí ta pa e impakto surpasá frontera di Kòrsou i pa e motibu akí mes e ‘Summit’ ta dirigí riba partisipashon di henter Reino Hulandes.
Durante di e summit tin orador i trainernan profeshonal (tantu lokal komo internashonal) brindando un variedat di training i seshonnan edukativo i interaktivo riba tereno di e.o. komunikashon stratégiko, komunikashon di krísis, transformashon digital, uso di inteligensia artifisial den komunikashon, ‘brand archetype’, ‘storytelling’, kon skibi mas efektivo i tambe komunikashon den sektor turístiko. Alabes tin seshonnan plenario i kolaborashon den grupo, i mas ku sufisiente oportunidat pa nètwèrk i sosialisá ku otro.
E “Communication & Media Summit” no lo tabata posibel sin aporte di i kolaborashon ku e siguiente kompania i organisashonnan lokal: Reshapers, Curaçao Tourist Bourd (CTB), ENNIA, Bureau Telecommunicatie & Post i TUI. Gobièrnu di Kòrsou ta pèrkurá pa sigui brinda eventonan similar na bienestar di komunidat di Kòrsou i tambe den kuadro di relashonnan den Reino.
