Publiká riba 06 Mart 2025
Willemstad – Djaweps 6 di mart, Gobièrnu di Kòrsou, representá pa Vise Promé Minister i alabes Minister di Desaroyo Ekonómiko, señor Charles Cooper, a firma un Memorandum of Understanding (MoU) awe huntu ku e Federashon Fekoskan. E kolaborashon importante aki ta enfoká riba realisashon di e Metanan di Desaroyo Duradero (SDG’s) i ta marka un logro grandi den e empeño pa desaroyo sosioekonómiko i durabilidat riba e isla. Señora Zita Jesus-Leito tambe tabata presente, komo esun responsabel pa e kartera di Desaroyo Ekonómiko, i kende a sostené e trayekto pa yega na e logro aki.
E Federashon Fekoskan, ku ta representá e interesnan di sinku kooperativa di spar i krédito ku mas di 29.000 miembro, ta dediká na inklushon finansiero i empoderamentu ekonómiko den komunidat. Pa medio di e kolaborashon aki, Gobièrnu i Fekoskan lo desaroyá proyektonan i inisiativanan huntu ku lo kontribuí na e SDG’s, ku un enfoke riba eliminashon di pobresa, edukashon finansiero, energia duradero, seguridat alimentisio i inklushon sosial.
Manera Minister Charles Cooper a bisa: “E kolaborashon aki ta suprayá e dedikashon di Kòrsou pa kresementu duradero i desaroyo ekonómiko inklusivo. Traha huntu ku Fekoskan lo fortifiká e impakto di nos strategia di SDG i kontribuí direktamente na un futuro mas resiliente i duradero pa nos komunidat.”
Ademas Minister Cooper, a enfatisá kiko kooperativismo a i ta nifiká pa su miembronan i nan famianan i pa Kòrsou.
Un parti importante tambe ku Minister Cooper a trese dilanti ta akshonnan ku lo tuma pa stimulá personanan ku ta disponé di terenonan agrario, pa nan realmente hasi uso di e terenonan aki pa plantashon i kontribuí na e meta di seguridat alimentisio pa nos pais.
Earlrich Lourens, presidente di Fekoskan a remarká ku: “E akuerdo aki ta unu históriko den e aña aki, ku Nashonnan Uní (United Nations) a deklará komo Aña Internashonal di Kooperativismo”, ku e tema “Kooperativanan ta Konstruí un Mundu Mihó”, esaki suprayando ku kooperativismo ta un mekanismo esensial pa realisá e Metanan di Desaroyo Sostenibel (SDG’s).”
E MoU ta establesé e base pa esfuersonan konhunto manera kampañanan di konsientisashon, programanan di training i oportunidatnan di finansiamentu pa proyektonan duradero. E inisiativa aki ta aliniá ku e agènda nashonal di SDG i ta kontribuí na un futuro inklusivo i duradero pa Kòrsou.
