Publiká riba 06 Òktober 2021
WILLEMSTAD – Komo akshonista di diferente kompania den e sektor energétiko di nos pais, Gobièrnu di Kòrsou su responsabilidat i prioridat ta pa perkurá stabilidat den e sektor. Den kuadro di esaki, tur desishon tumá ta keda analisá di forma krítiko i ku e koutela nesesario pa garantisá toma di desishon ku ta na bienestar di nos komunidat.
Pa loke ta trata e proseso ku ta andando na Refineria di Kòrsou (RdK), gobièrnu ta konfirmá di a informá hunta di komisario aktual i gerensia den un karta fechá 23 di sèptèmber 2021, di no tin konfiansa den nan mas. Riba kual dia 27 di sèptèmber 2021, representante di akshonista a risibí un kontesta kaminda tantu e hunta di komisario komo gerensia tambe ta pone nan puesto na disposishon.
Miéntras tin un proseso andando pa salbaguardiá integridat di e proseso i tambe respetá privasidat di tur envolví, gobièrnu lo no duna komentario adishonal.
