Publiká riba 02 Yüli 2026
Willemstad – Bou di kordinashon i den koperashon estrecho ku Defensa di Reino, Gobièrnu di Kòrsou ta kordinando yudansa humanitario pa Venezuela. Riba djaweps, 2 di yüli, a kolektá palètnan ku produktonan di donashon na Sambil pa transportá esakinan pa Venezuela.
For di momento di e temblornan riba 24 di yüni, Kòrsou a aktivá ku vários akshon konkreto pa por brinda yudansa na bisiña Venezuela. A sòru, ku yudansa di diferente partner i boluntarionan, pa hospedahe algun dia pa un grupo di pasaheronan venezolano ku tabata pegá aki na Kòrsou promé ku nan por a sigui biaha pa Venezuela komo nan destinashon final. Tambe a fasilitá i fleksibilisá diferente prosesonan pa nos pais por fungi komo “hub” humanitario pa Venezuela.
Promé Minister Pisas, alabes Minister di Asuntunan General, a enkargá direktor di Direktorado di Kontrol di riesgo i Maneho pa kalamidat (DRR), sr. Lesley Fer, pa kordiná tur lokual ta nesesario pa e yudansa di Kòrsou na bisiña Venezuela kana lihé, efektivo i efisiente. Importante den e proseso aki ta pa keda tene na kuenta kiko Venezuela tin mas mester di dje i ta pidi na yudansa. DRR ta yudando ku e proseso di logístika huntu ku organisashonan ku ta kolektá donashonnan e.o. na Sambil, p’asina Marina Real i Defensa di Reino pero tambe Defensa Merikano por transportá produktonan i entregá na e outoridanan na Venezuela. Di e forma aki por garantisá ku e produktonan ta kumpli ku nan meta humanitario, pero tambe ku ta manda produktonan di un forma sigur i legal.
Aktualmente tin hopi organisashonan internashonal na Venezuela ku ta yudando ku reskate, pero ku poko poko e meta primordial lo move di reskate pa yudansa. Mirando e impakto i dañonan kousá den e área afektá, e periodo di yudansa lo dura hopi mas largu. Gobièrnu di Kòrsou lo konsentrá su aporte tambe na e periodo aki, ku ta ser yamá ”na-fase”.
Un i tur ku kier hasi donashon òf manda produktonan Venezuela, por hasi esaki via e instansianan ku ta kolektá na Sambil. Importante pa tene kuenta ku e listanan di produkto i solamente hiba lokual e pais ta pidi i tin mester. Tambe ta posibel pa hasi donashon finansiero via Rode Kruis na number di kuenta di MCB #2004. Palabranan di gratitut na tur boluntario i organisashonnan ku a i ta brinda nan aporte i a hasi donashon.
Gobièrnu ta bolbe manda palabranan di forsa na komunidat Venezolano i ta keda solidario.
