Publiká riba 01 Ougùstùs 2019
WILLEMSTAD – Dia 26 di yüli 2019 Gobièrnu di Kòrsou a tuma nota di e konseho di Ofisina Sentral di Statistik (Centraal Bureau voor de Statistiek) kaminda ta konsiderá Hòspital Nobo Otrobanda (HNO) komo sektor kolektivo. A base di esei Ministernan di Finansa i Salubridat Públiko, Medio Ambiente i Naturalesa a sinta huntu ku konseheronan pa skucha nan opinion i konseho riba esaki.
Loke a bin dilanti komo konseho ta pa aserká Gobièrnu di Hulanda un bes mas i wak e posibilidatnan pa un fiansa, kaminda den e petishon na Gobièrnu di Hulanda ta pone énfasis riba e kondishon i palabrashonnan ku tin di haber ku fiansanan anteriormente hasí na fabor di e proyekto HNO. Tambe lo elaborá riba separashon di e organisashon HNO-Governance ku tin ku tuma lugá den dos fase. A base di e konseho akí a tuma e desishon pa hala aden e desishon ku Konseho di Minister a tuma dia 3 di yüli último relashoná ku e Akuerdo di liñanan grandi (Hoofdlijnenakkoord) enkuanto HNO.
Gobièrnu lo pèrkurá pa sigui vigilá progreso di e proyekto HNO i pa entregá e hòspital nobo e aña akí manera planifiká. Salú di e siudadano ta bin na promé lugá.
