Publiká riba 12 Desèmber 2022
WILLEMSTAD – Manera ya ta konosí tabatin dos kaso di apelashon kontra di e veredikto di Korte den Promé Instansia, den kual a dikta ku den ousensia di un alternativa di un union legal pa hendenan di mésun sekso, ekivalente na nos matrimonio tradishonal, esta matrimonio entre un hòmber i un muhé, e eksklushon di hendenan di mésun sekso for di nos matrimonio tradishonal, ta kontra di artíkulo 3 di nos Areglo di estado ku ta prohibí diskriminashon.
Tantu e pareha homoseksual i e Organisashon Human Rights Caribbean, ku a inisiá e kaso, komo Gobièrnu di Kòrsou a apelá e desishon di e wes.
E pareha pa motibu ku e tabata ke pa wes dikta ku, kontrali na loke lei ta preskribí, nos matrimonio tradishonal mester konta pa parehanan di mésun sekso tambe i Gobièrnu di Kòrsou pa motibu ku e ta di opinion ku e no tin ningun obligashon hurídiko, ni nashonal i tampoko internashonal, pa habri matrimonio tradishonal òf instituí un otro institushon semehante na nos matrimonio tradishonal pa parehanan homoseksual.
Gobièrnu di Kòrsou sin embargo no ta konvensí ku e veredikto di Korte di Apelashon ta korekto i pa e motibu akí a tuma e desishon pa bai Kasashon.
