Publiká riba 09 Ougùstùs 2021
WILLEMSTAD – Riba djaluna 9 di ougùstùs 2021, Gobièrnu di Kòrsou a entregá na Parlamento di Kòrsou e di dos raportahe interino ku ta kubri tur desaroyo i akshonnan ku a tuma lugá den e periodo di òktober 2020 te ku mei 2021 relashoná ku e krísis di COVID-19. Di e forma akí gobièrnu – a traves di dokumentashon i interpretashon amplio di datonan – ta duna un bista transparente di i aserka responsabilisá kada akshon ku a tuma den kuadro di maneho di krísis. Ademas e raportahe akí ta forma e base kon pa medio di analisashon i evaluashon profundo, por sigui traha na maneho ku ta yuda krea e kondishonnan nesesario pa Kòrsou logra rekuperá konsiderablemente for di e krísis akí.
E raportahe ta duna informashon detayá (esta sostené pa sifranan) tokante tur desaroyo epidemiológiko, kon e proseso di hospitalisashon a kana, ehekushon di e trayekto di bakunashon, medidanan ku a implementá i eksonerashonnan ku mester a duna den e kaso akí, kiko tur tabata e konsekuensianan sosial-ekonómiko pa komunidat di Kòrsou i tambe kon gobièrnu e komuniká riba tur esaki durante e periodo ariba meshoná.
Tambe den e raportahe ta para ketu na pasonan importante ku tantu Gobièrnu komo pueblo mester tuma pa konhuntamente por sigui manehá e krísis di COVID-19. Ku otro palabra, ki tipo di akshonnan krusial Gobièrnu mester kaba di tuma den kuadro di maneho optimal di krísis i kuantu solidarismo por nota bou di hendenan den nos komunidat pa keda kumpli ku tur medida i reglanan básiko. Esaki ta sumamente determinante pa e forma kon den e periodo benidero lo sigui atendé ku implementashon i/òf suavisashon di medidanan, tur esaki dependiendo di e kantidat di kontagio, hospitalisashon i grado di bakunashon.
Den e dianan ku ta bini Parlamento di Kòrsou lo risibí un presentashon riba e dokumento entregá.
