Publiká riba 30 Ougùstùs 2019
WILLEMSTAD- Riba 12 di yüli 2019 Konseho di Minister di Reino a disidí di duna Gobièrnu di Kòrsou un ‘aanwijzing’ manera stipulá den e Lei di Reino di supervishon finansiero di Kòrsou i St. Maarten.
Meta di e ‘aanwijzing’ ta pa alkansá un presupuesto di 2019 balansá, kompensashon di e défisitnan realisá den 2017 i 2018 i posibelmente 2019, den un periodo di tres aña kuminsando den 2020. Tambe e ‘aanwijzing’ tin komo meta pa pago di debenan na ‘Algemeen Pensioenfonds Curaçao’ i Banko di Seguro Sosial tuma lugá promé ku 31 di desèmber 2022.
Riba djabièrnè 23 di ougùstùs Kòrsou a entregá un karta di apelashon na Konseho di Estado di Reino (Raad van State). Meta di e karta di apelashon ta anikilisashon di e ‘aanwijzing,’ a lo ménos kambio di e ‘aanwijzing’ di tal manera ku Kòrsou entrante 2021 ta kompensá e défisitnan den sinku aña en bes di entrante 2020 i den tres aña manera stipulá den e ‘aanwijzing.’
Gabinete ta kere den finansa di Gobièrnu duradero i sostenibel. Sinembargo, e finansa di Gobièrnu no ta desaroyá den un vakuo, pero ta konektá fuertemente ku ekonomia di e isla. No ta un sekreto ku ekonomia di Kòrsou ta den reseshon pa hopi aña kaba. Un reseshon ke men ku no tin kresementu den e ekonomia. Sin un ekonomia ku ta krese lo tin mas desempleo i servisio públiko lo krem ya ku tin ménos rekurso pa invertí den komunidat.
Gobièrnu ta di opinion ku ekonomisashon so no ta e solushon pa e problemanan ku Kòrsou ta konfrontando. Na inisio di e reunion di Konseho di Minister di Reino, Gobièrnu a negoshá intensivamente ku Hulanda tokante un akuerdo di koperashon i sosten den implementashon di e Strategia di Kresementu di Kòrsou. A sera e akuerdo akí dia 12 di yüli i ta implementando esaki na e momentu akí. E Strategia di Kresementu ta dirihí riba introdukshon di reforma den e aparato gubernamental i den ekonomia, ku ta duna Kòrsou e abilidat pa enfrentá hopi di e retonan presentá na dje.
Den e karta di apelashon Gobièrnu a enfatisá ku e aspirashon pa un balanse di presupuesto ta hopi importante pa futuro di Kòrsou. Sinembargo, e balanse di presupuesto no ta alkansabel sin kresementu ekonómiko. Pa alkansá kresementu ekonómiko invershon i tempu ta nesesario. Hulanda a rekonosé e punto di salida akí tambe den e firmamentu di e Akuerdo di Kresementu. Ademas, Fondo Monetario Internashonal (Internationaal Monetair Fonds) a avisá kontra un redukshon muchu lihé di e plafòn di gastunan di Gobièrnu mirando e krem ekonómiko serio ku por resultá di esaki. Tal manera di aktuashon pues ta traha kontrario. Pa e motibu ei, Gobièrnu ta di opinion ku Konseho di Minister di Reino no por a yega rasonabelmente na e ‘aanwijzing’ den su forma manera e ta aktualmente, i ta spera tratamentu di e karta di apelashon ku konfiansa.
