Bo opinion

Notisia

Gobièrnu di Kòrsou ta insistí pa manda produktonan humanitario bou di sirkumstansianan sigur i no forsá.

Geplaatst op 23 February 2019 dor di Ministerio Asuntunan General i Promé Minister

Willemstad – Gobièrnu di Kòrsou ta insistí ku transporte di produktonan humanitario pa Venezuela mester tuma lugá bou di sirkumstansianan sigur, i no forsá. Esaki a base di e akuerdo den parlamento di Kòrsou ku a deliberá ampliamente riba dje e siman aki.

Konforme e akuerdo ei, un buelo for di Miami ku kargo humanitario, kolektá na South Florida dor di gruponan Latino, por a yega Kòrsou djarason atardi. Gobièrnu a papia for di wikènt tras di lomba ku organisadónan di e transporte i a splika e posishon di Kòrsou. A splika e posishon di Kòrsou un biaha mas despues di e debate den Staten, i tambe a pone e kriterianan bou di kua e transporta por tuma lugá pa Venezuela por eskrito den un karta pa presidente interino Juan Guiadó.

E organisadónan di e transporte a duna di konosé djabièrnè atardi na duana, ku e barku ku produktonan tin komo destinashon Boneiru. Pa motibu ku ta trata di un transporte privá via di kompanianan komersial, Gobièrnu no tin niun base legal di por a prohibí e transporte menshoná, ni maské e organisadó a menshoná ku e destinashon final di e transporte lo ta Puerto Cabello na Venezuela.

Segun leinan ku duana ta traha kuné, e organisadónan ta violá lei, si tòg nan ta bai un otro destinashon ku esun menshoná riba e karta di karga (vrachtbrief). Pero esaki no ta responsabilidat di e puerto di salida ku ta Kòrsou, i komo tal Kòrsou no tin base legal pa por evitá pa e barku sali for di Kòrsou pa Boneiru. Sinembargo, Gobièrnu  ta hasi un yamada na tur partido envolví, hasta si ta trata partidonan privá i komersial, pa honra e posishon ku parlamentu i Gobièrnu a tuma.

Na e organisadónan i e gruponan di Venozolano na Kòrsou, ku ta purba sali ku e barku, Gobièrnu di  Kòrsou a komprometé su mes di yuda e pueblo Venezolano ku ta den gran nesedidat. A base di rèspèt i kolaborashon mutuo, e produktonan humanitario lo yega Venezuela na e momento ku e sirkumstansianan ta pèrmití pa nan drenta seif, sin ku tin resistensia.

Download e komunikado aki na Ingles.

Download e komunikado aki na Spañó.

Ministerio konserní