Publiká riba 09 Ougùstùs 2018
GOBIERNU DI KÒRSOU TA INVERTÍ DEN DESAROYO DI E FUNSHONARIONAN PÚBLIKO.
Willemstad – Gobièrnu di Kòrsou lo invertí den desaroyo di su empleadonan públiko. Entrante di sèptèmber di 2018 ta kuminsá ku un proyekto di desaroyo di talento yamá
“Talento”. Den último lunanan Beleidsorganisatie di HRO di e ministerio di Gobernashon, Planifikashon i Servisio Públiko a traha duru riba e proyekto aki. Tabatin hopi kontakto ku e Programa di Desaroyo di Talento (TOP) – Bonaire, e ministerio di Asuntunan Interior di Relashonnan di Reino (Min BZK) i e representante di Hulanda na Kòrsou (VNW).
Talento ta un proyekto ku ta forma parti di e programma ‘Impulso’. Impulso ta enfoká riba optimalisá e aparato públiko. Na sèptèmber 2018 gobièrnu ta start ku un proyekto piloto Talento. Durante un aña e partisipantenan ta sigui un proseso di entrenamentu i un programa di kapasitashon kaminda ku nan ta haña nan entrenamentu serka un mentor. E ta dirigí riba 4 ministerio. Kada ministerio ta proponé 4 talento a base di prosedimentu di selekshon. Tur empleado ku ke bini na remarke por solisitá. E ministerionan selekshoná pa e proyekto piloto aki ta ministerio di Gobernashon, Planifikashon i Servisio Públiko, ministerio di Desaroyo Sosial, Trabou i Bienestar, e ministerio di Edukashon, Siensia, Kultura i Deporte i e ministerio
Di Hustisia. E ministerionan aki a keda skohé a base di e prioridatnan deskribí den akuerdo di gobernashon 2017-2021. Na un etapa mas despues e otro ministerionan ku falta tambe lo keda envolví.
E kandidatonan lo por siña unu di otro i traha huntu pa atkirí i apliká e konosementu konhuntamente. E meta ta pa logra un impakto optimal den práktika di e manera aki. Nan lo siña kon mas mihó lidiá ku desafionan den trabou i di e manera aki kontribuí na e proyekto konkretamente pa e sosiedat.
Talento a keda establesé den kolaborashon ku e programa di Desaroyo di Talento (TOP) -Bonaire, e ministerio di Asuntunan Interior di Relashonnan di Reino (Min BZK) i e representante di Hulanda na Kòrsou (VNW).
Pa mas informashon por tuma kontakto ku Kesha Camelia na number 529-1010 òf na kesha.camelia@gobiernu.cw.
