Bo opinion

Notisia

Gobièrnu di Kòrsou ta kere den nos estado di derecho.

Geplaatst op 21 February 2019 dor di Ministerio Asuntunan General i Promé Minister

WILLEMSTAD– Awe djaweps 21 di febrüari 2019, Gobièrnu di Kòrsou a akseptá retiru di Minister di Desaroyo Ekonómiko, Dr. Steven Martina. E motibu ku Minister Steven Martina ta entregá su retiru ta pasobra Ministerio Públiko a inisiá un investigashon riba e prosedura ku a sigui pa yega na e desishon tokante responsabilidat hurídiko di seguro, mas mihó konosí komo ʹWettelijke Aansprakelijkheid (WA)ʹ.

Tur miembro di Gabinete Rhuggenaath a ekspresá ku nan tin komprenshon pa e desishon i ta kompartí e pensamentu, meskos ku Minister Martina, ku mester duna hustisia espasio pa kana su kurso. Esaki ta muestra di transparensia i integridat di su banda.

Gabinete Rhuggenaath ta kere den nos demokrasia i nos estado di derecho i e funshon di Ministerio Públiko. Ta konfia ku hustisia lo hasi su trabou manera mester ta i ku tur kos lo klara na su debido tempu.

Ministernan di Gabinete Rhuggenaath kier gradisí sr.dr. Steven Martina pa tur esfuerso ehersé i pa e kontribushon sumamente balioso ku ela duna den e último aña i mei aki, komo minister ku e kartera di Desaroyo Ekonómiko.

Ministerio konserní