Publiká riba 17 Sèptèmber 2019
WILLEMSTAD – Promé Minister Eugene Rhuggenaath, pa medio di un deklarashon, a duna inisio ofisial na un kampaña di komunikashon kaminda ta bai informá komunidat di tur desaroyo rondó di Refineria Isla.
For di momento ku e Gobièrnu aktual a tuma mando, e trayekto pa yega na un operadó òf doño nobo pa nos refineria tabata un prioridat. Durante e proseso aki Gobièrnu a komuniká na momentunan klave, dunando asina informashon balioso pa mantené komunidat na altura di e último desaroyonan. Esaki a tuma lugá den kontinuo kolaborashon ku Refineria di Kòrsou (RdK), ku a tuma un parti importante di e komunikashon na su enkargo. No opstante esaki, Gobièrnu ta realisá ku nos a drenta un fase final hopi kardinal, kaminda ta eksistí un nesesidat grandi bou di diferente grupo pa oumentá e kantidat di informashon i komunikashon ku ta sali p’afó.
Teniendo bon kuenta ku esaki, Gobièrnu a tuma e desishon importante pa enkargá PMU – esta e Program Management Unit ku Gobièrnu a lanta pa asistí e tim di spesialista di RdK den e proseso pa yega na sea un operadó òf doño nobo pa e refineria – ku e.o. tur aspekto komunikativo den e trayekto aki. Di forma konkreto, dirihí i fásil pa komprondé, Gobièrnu ta bai komuniká desde awor muchu mas ekstenso riba tur loke ta sosodé ku i rondó di nos refineria, asina sigurando ku komunidat por sinti su mes kompletamente partísipe i parti di e totalidat.
E kampaña lo ser guiá pa un bosero den e persona di Thakaidzwa “Thakai” Doran, ku atraves di su konosementu riba e materia i personalidat habrí, a pone su mes kompletamente na disposishon di e proyekto importante aki pa trese komunidat e informashon nesesario. Den transkurso di e periodo benidero, por bai mira sr. Doran trese klaridat riba hopi punto di importansia pa medio di produktonan oudiovisual di Gobièrnu, entrevistanan i varios otro medionan di komunikashon. Por lo tanto Gobièrnu ke pidi komunidat pa sigui tur e kanalnan ofisial di komunikashon di Gobièrnu di Kòrsou, asina e informashon por yega na un-i-tur.
Riba foto: Sr. Thakaidzwa “Thakai” Doran
Promé Minister Rhuggenaath na final di su deklarashon un bes mas a enfatisá ku Gobièrnu ta bai pa un resultado final positivo ku ta keda influensiá pa bon preparashon i direkshon. Meta ta pa pronto por finalisá e trayekto di búskeda, di forma ku Kòrsou por mira futuro ku konfiansa atrobe. Komunikashon efektivo sigur lo fasilitá den esaki.
