Publiká riba 18 Òktober 2021
Den un seremonia solem na Plasa Piar dilanti un públiko grandi sr. Marlon Regales komo maestro di seremonia, sr. Wim van Lamoen komo orador di órden i sr. Venancio ‘Pacheco’ Domacassé a presentá e manifesto di maneho di nos héroenan na sra. Lizette Sambo-Velder, direktor di Sektor di Kultura i Deporte, ku tabata representá e minister enkargá ku Kultura sr. Sithree van Heydoorn.
Vários organisashon mas a rindi tributo na e héroe akí manera: Kònsùl di Venezuela sra. Chan, Fundashon Manuel C. Piar sr. Venancio ‘Pacheco’ Domacassé, Fundashon Almirante Luis Brion sr. de Groot, Sociedad Bolivariana de Curazao sr. Yores i pa desendientenan di Manuel Piar sr. Elvis Marchena-Piar. Tur esaki a sosodé den presensia di direktor, maestro- i alumnonan di skol di fundeshi M.C. Piar, kende tambe tabata presente na e konmemorashon. Politie Harmonie a toka e himnonan di Hulanda, Kòrsou i Venezuela di un manera inpreshonante durante di e seremonia.
Manuel C. Piar tabata un guerero yu di Kòrsou destiná pa desempeñá un papel krusial den liberashon di e kontinente Suramerikano. Ku 12 aña e tabata yuda afrikanonan sklabisá hui via Rif bai Venezuela ku barku. Ku 23 aña el a partisipá den e lantamentu na la Guaira. Na 1804 el a evitá un invashon ingles na Kòrsou. Alabes el a yuda Haiti i despues di 24 bataya sin niun derota el a bin bira libertador di sur di Venezuela. Pa motibu di desakuerdonan ku Simon Bolivar el a keda fusilá 5’or di atardi riba 16 di òktober 1817.
Despues di 204 aña Venezuela ta bai hasi hustisia dor di pone e restunan mortal di Manuel C. Piar den Panteon Nashonal na Caracas. E petishon i trayekto akí ta den preparashon pa huntu komo nashon nos ban duna honor na nos mes hendenan den harmonia ku Venezuela.
Gobièrnu di Kòrsou ta sigui kere den nos mes hendenan i stimulá e idea di duna mas publisidat na e logronan di nos mes hendenan manera Manuel C. Piar, ku ta nos héroenan nashonal.
*Riba e fotonan athunto por tuma nota di e konmemorashon. Tambe por bishitá e página di facebook di Ministerio: Konmemorashon 204 aña morto di Manuel C. Piar