Publiká riba 05 Sèptèmber 2019
WILLEMSTAD – Den kuadro di krea mas konosementu bou di komunidat di Kòrsou i internashonalmente tokante oportunidatnan di invershon i proyektonan di invershon andando na Kòrsou, Gobièrnu di Kòrsou ofisialmente a lansa un kampaña di komunikashon titulá “Un Kòrsou Próspero”. E kampaña di komunikashon ta duna informashon amplio tokante proyektonan di invershon den áreanan manera Tursimo, Logístiko, Desaroyo di sentro di siudat, Konstrukshon di kas, Agrikultura, Krio di bestia i Peska. Durante e kampaña lo pone spòtlait tambe riba diferente persona involví den e proyektonan.
Lema di e kampaña ta: “Abo ta importante pa un Kòrsou próspero”. Ku esaki ke enfatisá importansia di e kontribushon balioso di kada individual pa ku e proyektonan di invershon, pa asina por garantisá un futuro próspero pa Kòrsou. Lo usa diferente medionan di komunikashon manera wèpsait, media sosial, imágen audiovisual i medionan tradishonal pa publiká informashon tokante e proyektonan di invershon.
Den presensia di Promé Minister Eugene Rhuggenaath, Minister di Desaroyo Ekonómiko Giselle Mc William, Minister di Tráfiko, Transporte i Planifikashon Urbano Zita Jesus-Leito i Minister di Finansa Kenneth Gijsbertha, e Tim di Invershon enkargá ku e proyekto akí a lansá e wèpsait www.unkorsouprospero.com. E wèpsait lo fungi komo e portal sentral pa haña informashon tokante e proyektonan di invershon. Tur informashon ta disponibel tantu na Papiamentu komo Ingles.
Ku e kampaña di informashon “Un Kòrsou Próspero” Gobièrnu ke demostrá un bes mas kada esfuerso ku ta hasi pa di forma transparente i atraves di inklushon yega mas serka na komunidat i gruponan di enfoke. Pa hopi hende proyektonan di invershon ta un konsepto hopi apstrakto i solamente dor di trese informashon di manera direkto, kontinuo i kla dilanti ta logra krea un mihó bista di e varios benefisionan pa e diferente gruponan di enfoke. Pa e motibu akí e kampaña di informashon ta primeramente dirihí riba korespondé ku e diferente faktornan di motivashon i emoshonnan ku ta biba bou di e gruponan akí. Esaki finalmente ta yuda krea un imágen positivo di e proyektonan.
E kampaña di komunikashon lo dura te ku fin di 2019 ku posibilidat di kontinuá na 2020. Gobièrnu di Kòrsou ke pidi komunidat di Kòrsou pa keda pendiente pa mas informashon interesante ku lo sigui den transkurso di e siguiente lunanan.
