Notisia

Den su afán pa mehorá kalidat di gobernashon i funshonamentu di su aparato públiko pa medio di komunikashon efektivo, Gobièrnu di Kòrsou a traha resien na un plan stratégiko di komunikashon pa:

• Krea mas transparensia den desishonnan i akshonnan ku ta tuma lugá riba nivel di maneho i den e aparato públiko;
• Yega na mas interakshon ku komunidat, kaminda Gobièrnu ta komuniká mas interaktivo ku tur “stakeholder”;
• Pa alsa kredibilidat i pues mehorá Gobièrnu su posishon i imáhen bou di tur grupo den komunidat.

Di e forma aki Gobièrnu di Kòrsou a tuma un paso serio den komprometé su mes na komuniká di un forma mas direkto i habrí ku pueblo di Kòrsou. Esaki teniendo kuenta ku deseo grandi di komunidat pa ta informá kontinuamente i tin e espasio nesesario pa por interkambiá ku gobièrnu tokante su nesesidatnan.

E plan stratégiko di komunikashon ta deskribí diferente akshonnan stratégiko kon ta bai komuniká di forma mas efektivo ku komunidat. Esaki entre otro dor di optimalisá uso di kanalnan eksistente manera wèpsait, kanal di televishon (Kanal 84) i página di Facebook di gobièrnu, pero tambe dor di implementá métodonan nobo manera Whatsapp i intensifiká uso di e retnan sosial.

Pa medio di Facebook por ehèmpel ta bai introdusí seshonnan semanal kaminda komunidat por hasi pregunta riba un tópiko aktual òf di relevansia. Banda di esaki ta kuminsá tambe ku “Fòrti Habrí”, un konsepto di komunikashon direkto kaminda representantenan di gruponan den komunidat ta interkambiá direktamente ku un mandatario òf trahadó públiko riba sierto tópiko.

Un aspekto importante di e plan stratégiko di komunikashon ta e parti di informashon gubernamental, esta “Voorlichting”; un tarea sumamente importante di gobièrnu. Gobièrnu tin e responsabilidat pa regularmente informá komunidat tokante asuntunan, lei i proseduranan ku tin su efekto riba habitantenan di un pais. Ehèmpelnan konkreto ku por menshoná ta: kiko ta ekonomia òf kultura di un pais, kiko ta ròl di CFT, ets.

Pa por ehersé esaki di forma korekto i kompleto, Gobièrnu di Kòrsou a nombra un bosero, den persona di sr. Egbert Figaroa, ku desde awor lo fungi komo fasilitadó di informashon. Esaki den ningun sentido lo eliminá e tarea importante di kada minister pa ku nan responsabilidat di sigui informá i komuniká ku pueblo. Banda di un bosero, tambe lo hasi uso amplio di métodonan di komunikashon moderno manera video animá pa informá i eduká komunidat. 

Finalmente, Gobièrnu di Kòrsou ta konsiente di i ta rekonosé e ròl importante di Prensa pa tene komunidat informá. Pa e motibu ei tambe e plan stratégiko di komunikashon ta para ketu na kon fortifiká su relashon ku Prensa na benefisio di komunidat di Kòrsou.

Anekso: Plan stratégiko di komunikashon 2019-2023 skibí na hulandes.

MAS NOTISIA

Ministerio konserní: Asuntunan General i Promé Minister