Publiká riba 16 Desèmber 2020
Gobièrnu di Kòrsou ta rindi honor na nos Baluarte Etzel Provence
WILLEMSTAD – Ku deskanso di sr. Etzel Provence, Kòrsou a pèrdè un di nos gran pioneronan di músika i un baluarte di gran balor pa nos nashon. Sr. Etzel Provence tabata biba pa músika i te ku korto promé ku su despedida di e mundu aki, ainda e tabata dediká su mes na pasa su gran konosementu musikal pa otronan. Di e forma aki, Gobièrnu di Kòrsou ke rindi un tributo spesial na loke sr, Etzel Provence a nifiká pa Kòrsou. Nos palabranan di pésame i kombibensia na su famia, amigunan i na komunidat ku e pèrdida aki.
Etsel Provence, digno yu di tera, a nase na Kòrsou dia 8 di desèmber 1938. Su amor pa músika a keda demostrá for di tempran i na edat di 14 aña, Sr. Provence a komponé su promé mazurka entitulá “Villa Maria”. Sr. Provence tabata dominá diferente instrumènt musikal i a dediká gran parti di su bida na pasa e konosementu i amor aki pa otronan.
Den su gran trayektoria, Sr. Provence a traha entre otro na Hulanda i Bèlgika komo dosente, pedagógiko i músiko na konservatorio. Aki na Kòrsou tambe, Sr. Provence a duna su kontribushon balioso den mundu di músika den vários funshon komo dosente, músiko, direktor i konsehero musikal na diferente skol manera ‘Curaçaose Muziekschool’, Akademia Musikal pa Sentro Kultural Kòrsou, St. Vincentiusschool, St. Albertus College, Radulphus College, Mgr. Zwijsen College, St. Jozef Mavo, Peter Stuyvesant College, Akademia Pedagógiko i hopi mas.
Aparte di tur esaki, Sr Provence tabata aktivo tambe komo dirigente di kor i huntu ku sr. Richard Simon a produsí un buki ku diferente kantika pa mucha. Gran parti di e kansionnan aki, a forma parti di un obra teatral ku a keda presentá den Sentro Pro Arte na aña 1968 den koperashon ku grandinan manera entre otro grupo di komedia Thalia i Salsbach Jazz Trio.
Sr. Provence a kontribuí tambe di forma fenomenal na e desaroyo di Scouting Antiano den Jamboree, partisipashon aktivo na Carifesta durante añanan 1971 i 1986 na Jamaica i Barbados, kompositor i dirigente na vários aktividat musikal pa pais di Antia manera selebrashon di 500 aña Pais Kòrsou, selebrashon 150 aña Enseñansa di nos pais i hopi mas.
Ku e fayesimentu di sr. Provence, Kòrsou sigur a pèrdè un di e gran pioneronan ku a sòru di pone un fundeshi musikal sólido pa nos pais. E sabiduria i siñansa ku Etzel Provence ta laga atras, sigur lo sigui biba i duna fruta pa hopi generashon mas.
Gobièrnu di Kòrsou sin duda algun, ta orguyoso ku Kòrsou por a konta ku un grandi manera Etzel Provence.
