Publiká riba 23 Desèmber 2021
WILLEMSTAD – Gobièrnu di Kòrsou, spesífikamente e Ministerio di Hustisia i Ministerio di Asuntunan General i Relashonnan Eksterior, a reuní dos biaha riba djaweps 23 di desèmber ku Konsulado General di Venezuela. E reunionnan akí a kana den bon esfera i Gobièrnu ta keda en espera di outorisashon pronto di outoridatnan Venezolano pa e buelonan konserní.
Durante e reunion Kònsùl General di Venezuela a indiká ku den kuadro di e variante nobo Ómikron di e vírùs di Corona, Gobièrnu di Venezuela a disidí di introdusí eksigenshanan nobo pa biaha (via buelonan di charter). E eksigenshanan nobo akí no ta ofishal ainda i no a komuniká esakinan ofisialmente tampoko. Gobièrnu di Kòrsou a perkurá ku e pasaheronan a kumpli ku tur rekisito Venezolano vigente pa por biaha bèk pa nan pais madre.
Gobièrnu di Venezuela, mediante e Kònsùl General, ta rekonosé su responsabilidat pa ku e pasaheronan ku a keda pegá na Kòrsou, komo ku esaki ta nan siudadanonan. Kònsùl General a duna di konosé di ta asumí su responsabilidat pa duna asistensha na e pasaheronan ku e keda pegá i pa informá e personanan konserní tambe di e desaroyonan. E kònsùl tambe a indiká ku tin sierto reto den esei. Gobièrnu di Kòrsou a ofresé yudansa i a kompartí informashon di forma ku e Kònsùl General por aserká i traha ku vários organisashon lokal ku por asistí nan pa kuida i informá e pasaheronan.
Gobièrnu di Kòrsou, pa medio di e kanalnan diplomatikó manera nos embahada na Caracas, lo keda hasi tur loke ta posibel pa logra outorisashon pronto pa e buelonan akí, i ta spera ku lo por transportá e pasaheronan e wikènt akí ainda bèk pa nan pais.
